Estajiáriu Cristiano dos Reis Gama
Prezidente Dewan Solidaritas Mahasiswa Pemuda Pelajar Timor Timur, (DSMPPTT), hamutuk ho nia membru sira hasoru malu Prezidente Repúblika (PR) José Ramos-Horta, hodi diskute asuntu importante sira ne’ebé sai hanesan preokupasaun nasional, inklui risku “fiscal cliff” no esforsu rekonsiliasaun paz iha Timor-Leste.
Prezidente Dewan Solidaritas Mahasiswa Pemuda Pelajar Timor Timur, João Sarmento, hateten, ohin halo audensia ho Prezidente Republika José Ramos-Horta, hodi ko’alia kona-ba asuntu balun ne’ebe mak sai hanesan preokupasaun nasional, kona-ba risku situasaun fiskal no rekonsiliasaun paz iha Timor Leste.
“Prezidente fó nia hanoin iha asuntu balun ne’ebe sai hanesan preokupasaun nasional ninian, por ezemplu ita bele dehan fiscal cliff ida ne’e mos sai hanesan preokupasaun ita nian Estadu Direitu Demokratiku Timor Leste, esforsu kona-ba rekonsiliasaun paz, konstrusaun paz iha Timor Leste, liu-liu iha momentu ne’ebe mak kritiku agora ne’ebe ita ka’alia kona-ba buat sira hanesan ne’e,” dehan Prezidente DSMPPTT, João Sarmento, Iha Palásiu Prezidensial Bairo-Pite, Tersa 14/04.
Nune’e mos iha hasoru malu ho prezidente Republika ne’e, aprezenta mos estrutura foun husi Dewan Solidaritas Mahasiswa Pemuda Pelajar Timor Timur, tanba DSMPPTT hanesan organizasaun estundantil ida ne’ebe mak nato’on eziste hahú husi 1998-1999 to’o mai ohin loron.
“Ami ko’alia kona-ba rezultadu husi kongressu ne’ebe mak foin lalais halo, depois hili ami, por ezemplu hau hanesan prezidente, sekretariu-jeral parte servisu fiskal inklui Doutor Antero iha ne’e hanesan eis Prezidente, Primeiru Prezidente Dewan Solidaritas nian ne’ebe mai ami ka’alia ida ne’e. Programa sira ne’ebe mak ami halo atu planea hodi halo entre 2026 -2030, tinan haat nia laran,” nia hateten.
Nia haktuir, Prezidente Republika José Ramos-Horta iha maneira ne’ebe mak amigavel konta istoria nia esperiensia sira ne’e, nia hakarak mos atu koopera fó apoiu ba Dewan Solidaritas Mahasiswa Pemuda Pelajar Timor Timur nia.
