Reportajen Adroaldo ‘Saretukau’
Sentru Juventude Munisípiu Bobonaru apoiu juventude munisípiu Bobonaru hodi hetan apoiu ba atividade formasaunno emprendedorizmu sosiál hodi dezenvolve sira nia abilidade ba dezenvolvimentu poténsia iha baze.
Membru ida hosi grupu Elze Roman Foinsa’e Kreativu, Jeca Perreira informa katak sira hetan apoiu hosi Sentru Juventude Munisípiu Bobonaru hodi hala’o sira nia atividade iha área pekuária.
“Ami juventude kria grupu ne’e hahú iha 2019, ami la’o ho kondisaun ne’ebé ami grupu hetan, grupu ne’e rasik kompostu hosi ami na’in hitu, ami nia grupu ne’e foka liu ba área pekuária ni-nian, ne’ebé haki’ak fahi”, hateten membru grupu Elze Roman Foinsa’e Kreativu, iha lansamentu Programa Joven Eleitu iha Postu Administrativu Maliana, 22/11.
Nia hateten iha tinan 2019 sira hetan apoiu hosi SEJD nia programa emprendedorizmu sosial ne’ebé oras ne’e sira hala’o hela ho 30%, grupu ne’e rasik hetan apoiu ho montante $750 hodi hala’o aktividade pekuária, maske osan ne’e seidauk sufisiente maibé nia ho nia kolega sira sei esforsu atu bele haki’ak fahi ho di’ak, nune’e bele hetan rezultadu hodi hatama ba merkadu.
Iha parte sorin juventude benefisiáriu hosi Sentru Juventude Munisípiu Bobonaru, Tressencia Soares Pereira ho nia belun na’in tolu seluk hato’o agradesimentu ba Sentru Juventude Munisípiu ne’ebé fo oportunidade ba sira, hodi reprezenta Munisípiu partisipa formasaun iha ETDA, Díli.
“Iha Kursu ida ne’e atu tuir iha parte haat hanesan housekeeping, kulinária, Customers service ho food garnish. Ami tuir formasaun ne’e, iha teória, prátika no estájiu, ikus liu ami taka ho kompetisaun mak hanesan ami hetan primeiru lugar iha kulinária no kuartu lugar ba iha housekeeping”,hateten Tressencia iha lansamentu Joven Eleitu Suku, 22/11.
Ba atividade Emprendedorimu Sosial, Jestór Sentru Juventude Munisípiu Bobonaro, Alcino Lopes hateten montante orsamentu ne’ebé SEJD apoiu mak total $60 mill ho tarjetu ba grupu 60, no iha ezekusaun 40% ba dahuluk nian Sentru Juventude ne’e rasik gasta ona $13.450. Sentru Juventude rasik aprova ona proposta 45 hosi proposta 85 ne’ebé sira avalia, kompostu hosi proposta sira mak mai hosi grupu juventude sira iha kada Postu Munisípiu Bobonaru nian.
“Joven sira inísia rasik ho sira nia kreatividade ne’ebé mak iha, depois sira hetan informasaun sira nia kreativdade foka liu iha pekuária hanesan hakika fahi, manu no bibi, ida tan mak konabá hortikultura kuda modo”, hatete Diretor Ezekutivu Alcino
Nune’e Sekretariu Estadu Juventude no Desportu, Abrao Saldanha Nokosiku enkoraja joven poténsia sira atu aproveita sira nia abilidade no rekursu balu, hodi bele dezenvolve sira nia kreatividade hodi kontribui ba dezenvolvimentu.
“Agora da-dauk iha hela programa ida estímula emprendedorizmu sosial, kazu sira bele replika, aplika fali sira nia koñesimentu sira, sira bele aplika ba fundu ne’e, bele hahú sira nia negósiu, hahú sira nia inisiativa, para nune’e bele fo servisu ba sira nia aan rasik”, dehan Abrão Nokosiku enkoraja joven sira.
