Reportajen Mendes “Haksolok” no Cornelio “Lakole”
Vice Sekretariu Jeral RENETIL loke torneu tenis RENETIL CUP iha anbitu Komemorasaun Loron RENETIL nian ba dala 31 no Loron Referendum ba dala 20, iha Kampu tTenis Caicoli Díli iha loron Sabadu, 06/07.
Vise Sekretaris Jéral RENETIL Francisco JMF “Lires” Belo, iha okaziaun loke torneu ne’e koalia kona ba importansia kamaradajen no kompanerizmu liu hosi atividade desportu. Nia mos espera atu hetan partisipasaun boot liutan ita eventu sira mak sei organiza tuir mai.
“Desportu hanesan ambiente ida atu fó aspirasaun ba nivel jogador, no envolve ita nia an hodi sai atleta ida ne’ebé melor jogador. Ita presiza konstrui kamaradajen, kompañerismu entre atleta ho atleta ou entre atleta ho jogador sira no atleta ho nia suporter sira. Iha nasaun seluk jogu kompetisaun sira hanesan ne’e jogador sira nia supporter sira mai barak hodi fó suporta ba nia favoritu jogador sira. Espera katak ita futuru ita sei organiza diak liu no esperansa komunidade sira bele mai partisipa masimu”, Tenik Vise I RENETIL.
Presidente Federasaun Tenis Timor-Leste, Aniceto Cardoso Alves, haktuir katak Federasaun la halo atividade ona iha tinan 2 nia laran tanba la iha fundus tan ne’e nia agradese RENETIL tanba bele loke torneu ne’e ba publik.
”Durante tinan rua ona Federasaun Tenis nunka la’o tanba fundus ba Federasaun laiha. Ami halo proposta ba governu maibe fundus sira dehan laiha, tanba ne’e durante tinan rua hahu husi 2017-2019 ne’e Federasaun la halo torneu ruma. Agaradese ba RENETIl ne’ebe kordena diak ho estrutura Federasaun hodi halao eventu ne’e. Iha esperansa boot RENETIL ho Federasaun Tenis bele serbisu hamutuk diak liu tan iha futuru, no atividade ne’e bele realiza anualmente”, tenik Aniceto.
Iha sorin seluk, Director Community Housing Group, Joselino Alves haktuir dalaruma labarik sira barak mak iha ona talentu ne’ebé diak maibé laiha kompetisaun hanesan ne’e. Nune’e la inspira sira atu sira bele esforsu sira nia-an, no karik iha kompetisaun sira iha internasional sira iha posibilidade bele lakon tanba sira ladun iha preparasaun maximu. Tanba ne’e nia husu ba Komapañia Timor oan hotu atu fó suporta ba atividade hanesan ne’e, hodi fó apoiu ba atividade jogu nian nune’e bele lori ita nia nasaun ba iha nasaun seluk, katak ita Timor mós bele.
Presidente Conselho Central RENETIL nian, Carlos Da Silva Lopes “ Saky” nudar Komisaun Organizador taxa RENETIL Cup, hateten katak objetivu loke torneu tenis RENETIL Cup, ne’e atu komemora Loron Aniversariu “RENETIL” ba dala 31, no Loron Referendum Timor-leste ba dala 20.
“Liu husi torneu ita bele hametin ita nia amizade entre jogador ho jogador, komunidade sira nune’e no ema estranjeiru ne’ebé mak serbisu iha ita nia rain. Liu husi torneu ita mós promove kria, paz, unidade, estabilidade entre Timor oan sira”, Saky esplika.
Saky mos esplika liutan katak entre ita Timor oan ne’ebé barak mak la kontrola nia an dala ruma monu iha violensa sira. Entaun ita buka atu evita, labele mosu iha violensia entaun dalan ida ita loke torneu ne’e rasik ne’e nia objetivu atu kria amizade, entre atleta no adeptu sira no entre ema hotu-hotu.
Torneu ne’e organiza tuir kategoria 6 mak hanesan under 20, iha feto no mane joga hotu, kategoria open, social iha single feto-mane no dupla. Eventu sei to’o iha 20 de Agostu. Komisaun Organizadora optimista katak atividade RENETIL Cup ne’e sei kontinua tanba dadaun ne’e RENETIL iha koneksaun diak ho Presidente Federasaun Tenis Timor-Leste ho nia estrutura tomak. Iha futuru sei konvida mós organizasaun rejistensia sira seluk. Torneu Tenis RENETIL Cup hetan apoiu husi emprezariu Timor-oan sira, hanesan Timor Plaza, Community Housing no Timor Telecom no mos kompañeru sira.
