Reportajen David da Costa Gusmao
Prezidente Asembleia Jerál Konfederasaun Desportu Timor-Leste (CDTL), Aniceto Gouveia Borlelo informa, governu liuhusi Sekretáriu Estadu Juventude no Desportu (SEJD) apoiu osan hamutuk Us$ 1.600 CDTL hodi realiza ba kongresu asembleia jerál CDTL nian ne’ebé mak sei halo iha dia 11 Dezembru tinan ne’e.
“SEJD apoiu osan Us$ 1.600 ba CDTL hodi halo Kongresu Asembleia Jerál CDTL. Lolos ne’e kongresu asembleia jerál CDTL ninia realiza ona iha 20 liu ba, maibé ho kestaun ami nia osan seidauk to’o hodi nune ami kansela no muda fali kongresu asembleia jerál CDTL ba iha loron 11 Dezembru tinan ne’e,” nia dehan liuhusi konferénsia imprensa iha GMT kaikoli, 29/11.
Nia haktuir iha kongresu asembleia jerál Konfederasaun Desportu Timor-Leste (CDTL) ne’ebe mak halo iha dia 11 Dezembru ne’e, iha federasaun hamutuk 28 mak sei partesipa iha Asembleia Jerál CDTL refere.
Alende ne’e mos, Prezidente Asembleia Jerál CDTL, informa tan iha fulan Outubru no Setembru iha kandidatu na’in tolu mak hatama naran, hodi kandidatu-an ba iha estrutura CDTL ba tinan 2021 to’o 2025. husi selesaun dokumentu ba na’in tolu, ema na’in ida mak la liu iha selesaun dokumentu.
“Hau lori asembleia jerál CDTL ninia atu hato’o katak, kandidatu ne’ebé mak pasa iha selesaun Dokumentus husi komisaun organizadora ba komité verifikasaun eleitorál CDTL nian katak iha ema na’in rua pasa iha selesaun dokumentu mak Afriano Xavier Amaral no Macário F. Sanches, sira na’in rua ne’e mak pasa iha selesaun dokumentu tanba sira na’in rua prenxe ona kritériu komité verifikasaun eleitorál ninia. Ho ida ne’e ami anunsia katak kandidatura na’in rua ne’e mak sei kompete iha estrutura CDTL ba iha tinan 2021 to’o 2025,” nia hato’o.
