Reportajen Adalgisa Pereira
Diretór Kadalak Sulimutu Institutu, Jenito Santana hateten lolos estadu no governu orgullu presenza Arte Moris ne’ebe halao ona knaar estadu ho governante sira, promove produto arte no kultura hanesan indentidade nasaun nian, tamba iha Timor so uniku Arte Moris mak iha galeria.
“ita nasaun ida mak laiha arte kultura nee ita nia klamar laiha ita nia indentidade, nasaun ne’e laiha ita nia estadu, orgullu ho presença arte moris nia ne’ebe halao ona knaar estadu no governante sira nian, liuliu atu promove ita nia produto arte no cultura hanesan indentidade nasaun nian, maibe sira rasik mak ba hamate fila fali depois ita fo fali espasu boot liu ba embaixada Indonesia, fo pusat budaya Indonesia harii fali iha ita nia rai, maibe ita rasik laiha fali pusat budaya ida, ita hanoin took nia koerensia ba asuntu problema ne’e oinsa ema seluk prifelesiu fo fatin diak ba sira iha ita nia rai rasik, maibe ita rasik la iha oportunidade” dehan Diretor Kadalak Sulimutu Institutu sede Hasatil 04/12.
Nia hatutan iha nasaun barak nivel kultural lao diak ne’e, banhira arte no kultura ne’e moris dezenvolve ho diak, uniku galeria iha Timor mak Arte Moris deit ona, presiza orgullu ba ida ne’e. Galeria Arte Moris reprezenta futuru Timor, governante haluha tiha joven sira ne’ebe mak aprende iha Arte Moris kontribui ba sosiedade no promove paz.
Iha fatin hanesan Asistente Advogadu Rede ba Rai, Elias Godinho informa governu laiha planu ne’ebe intregradu atu halo alokasaun ba sira, sasan sira ne’e la trata hanesan ema umanu liliu sira nia rezultadu husi produtu ne’ebe arte sira produs, rezultadu sira ne’e dalaruma ema ne’ebe tun ba despesu ne’e estraga iha puliku
“Ami haree iha aspeito legal nia iha prosedimentu ba despesu nee la tuir regras i mos tenke trata pratrimoniu ema nia produto husi arte nia ho dignu, ema ne’ebe hasai sasan ne’e la konsiente imagen ne’ebe soe iha fatin publiku, ne’e figura líder resistênsia, ita tenke dignifika sira, ita halo despesu nia objetivu ba dezenvolvimentu, maibe desenvolvimento ita harii iha estadu ida ne’e, tamba ema sira ne’e nia kontribuisaun, prosesu despesu ne’e prosesu sei ketak ida” informa Asistente Advogadu Rede ba Rai.
Hanesan mos ho Koordenador Nasional Rede ba Rai, Pedrito Veira hateten maneira arte nee parte ida husi dezenvolvimentu, laos halo uma andar sira ne’e mak dezenvolvimentu, maibe dezenvolvimentu ne’e banhira o nia ema sai matenek, oinsa fo oportunidade ba joven sira atu kria kualidade de pensamentu kriatividade, ida ne’e mak dehan dezenvolvimentu.
