Reportajen Silvino Freitas
Universidade Katolica Timorense (UCT) Sao Joao Paulo II, nia ezisténsia atu halo novidade ida ne’ebé mak diferente iha sosiedade akadémiku, hodi tau prioridade liu ba garante kualidade estudante.
Arsebispo Arkedioseze Metropolitana Dili, Dom Virgílio do Carmo da Silva iha serimónia tomada de posse hateten, UCT nia moris laos novidades ida ba sosiedade Timor Leste.
“Iha Timor iha sidade Dili de’it universidade barak tebes, nee duni loke universidade ne’e laos novidade ida maibe universidade catolica sei lori novidades ida ne’ebé mak diferente ba ita nia sosiedade no nasaun” dehan Dom Virgilio iha serimonia tomada de posse iha salaun Nobel da Paz, Campus Central UCT Balide, 14/12.
Nia hatutan UCT nia ezistensia laos atu aumenta numeiru Universidade maibe atu esforsu oin-nusa mak halo diferensa, UCT laos preokupa ho numeiru estudante maibe atu halo akompanamentu ne’ebé diak ba estudante hodi tau prioridade ba garante kualidade estudante sira nian.
“Kuandu lisensimentu la to’o lalais, amu-lulik balun mai dehan ba hau, amo tamba sa mak tenki preokupa ho lisensimentu universidade hira mak iha Dili ne’e trata tiha ona lisensimentu mak halo, loke ona ba mak halo lisensimentu” nia dehan.
Nia fundamenta tan katak, maske susar maibe hahu inisiu kedas tau iha pasu ne’ebé los, atu nunee ita bele lao tuir, hanesan ita hotu hatene molok mai to’o iha tempu ida ne’e ita hein kuaze dekade rua, tamba ho razaun oinoin.
Nia serteza, estatutu UCT nian sei ajuda ita hodi garante obra ne’e bele lao ho diak, temba deskreve ho lolos ona ema idak-idak nia no tulun mos ita atu halo kontrolu servisu iha kontabilidade transparensia ne’ebé diak.
