Reportajen David da Costa Gusmao
Reprezentante VIII Governu Konstitusionál ne’ebé reprezenta husi Ministru Presidénsia Konsellu Ministru, Fidelis Manuel Leite Magalhães dehan foinsa’e no joven sira hotu tenke aprende no banati tuir Saudozu Max Stahl, tanba nia halo buat di’ak barak ona.
“Iha biban ida ne’e atu hato’o ba foinsa’e sira, atu aprende no hola banati tuir buat di’ak barak, ne’ebè saudozu Max Stahl halo ona. Ida mak atu valoriza, solidariedade Internasionál katak ita hola parte iha mundu, iha nasaun barak mak terus no susar liu ita iha momemtu ida ne’e, sei presiza ita atu nakloke nafatin hatudu kompaixaun, ita hanesan sidadaun responsavel komunidade internasionál nian,” Dehan Fidelis iha Salaun VIP, aero portu Internasionál Nicolao Lobatu Comoro Dili, Kuarta 15/12.
Nia haktuir espíritu saudozu Max Stahl nian ne’ebé loos husi Inglaterra, ne’ebe iha momentu ida ne’e nia nu’udar timoroan, “Hanesan ita sira hotu ne’ebé hamrik iha ne’e, ne’ebé saudozu Max Stahl Timoroan, nia ita nian, faz parte husi ita ninia istori, nune’e mós hanesan ho nia família”.
Alende ne’e Governate mós husu ba komunidade sira hotu, atu partisipa no fó onra ba memória saudozu Max Stahl nian.
Saudozu Max Stahl hakotu iis iha Brisbane, Australia iha tuku 4.30 madrugada oras Austrália nian, no nia isin mate sunu ka halo kremasaun iha Loron 12 Novembru tinan ne’e iha Austrália.
Christopher Wenner naran konesidu Max Stahl moris iha 6 Dezembru 1954. Iha Londres, no Hetan kondekorasaun Ordem Grande Colar husi estadu Timor-Leste no sai sidadaun espesiál Timor-Leste iha Novembru 2019.
