Reportajen David da Costa Gusmao
Saudozu Christopher Max Stahl nia sinzas to’o ona iha Dili, ho Aviaun Qantas Iha Tuku 11.38 OTL, iha aero porto Internasional Nicolau Lobato, ne’ebe akompaña husi Saudozu nia Espoza no nia oan, no mós família balun.
Hafoin to’o Ofisiálmente sinzas Saudozu Max Stahl entrega direta husi nia oan feto ba iha lider Nasionál na’in rua Xanana Gusmão no Dr. José Manuel Ramos Horta ne’ebé simu diretamente no akompaña mós ho lian dadolin, nu’udar símbolu tradisaun Timor nian husi lia na’in sira.
Husi ne’e kontinua entrega ba parada Militár hodi hakat lori tama saudozu nia sinzas ba fatin VIP nian iha aero porto Nicolau Lobato, hafoin minutu balun lori deskansa iha sala VIP nian, ho ida ne’e reprezentante governu Fidelis Manuel Leite Magalhães lori tais, hodi tara iha sinzas Max Stahl nian, no hato’o mos benvindu ba Max Stahl nia sinzas, no nia espoza oan no familia sira hotu. hafoin ida ne’e kontinua halo konvoi.
Rute halo konvoi mk husu aero portu, tesik mai tasi ibun, liu ba igreja Motal, palasiu governu, Bidau Kuluhun, igreja Becora, Vila Harmonia Bekusi, Taibesi Xia Rate, kurjamentu Lahane, igreja Balide, sede Komite 12 Novembru, igreja Katedral, rotunda jardín 5 de Maiu Kolmera, Embaixada Portugal no ikus rai iha Camstal.
Akompanha iha konvoi ne’e mak Polisia Nasional Timor-Leste, Falintil-Forsa Defeza Timor Leste, lideransa nasional Ramos Horta, membru governu, familia matebian saudozu Max Stahl sobrevivente 12 Novembru, jornalista sira husi Asosiasaun Jornalista Timor Leste, Timor-Leste Press Union inklui entidade sira seluk.
Saudozu Max Stahl hakotu is iha Brisbane, Australia iha tuku 4.30 madrugada oras Austrália nian, no Nia isin mate sunu ka halo Kremasaun iha Loron 12 Fulan Novembru tinan ne’e iha Austrália.
Christopher Wenner naran konesidu Max Stahl moris iha 6 Dezembru 1954. Iha Londres, no Hetan kondekorasaun Ordem Grande Colar husi estadu Timor-Leste no sai sidadaun espesiál Timor-Leste iha Novembru 2019.
