Home Notisia AJTL-PPMN Realiza Treinamentu Jornalizmu Sidadania ho Perspetiva Jéneru no Inkluzaun Ba Períodu...

AJTL-PPMN Realiza Treinamentu Jornalizmu Sidadania ho Perspetiva Jéneru no Inkluzaun Ba Períodu Eleisaun

176
0
Treinamentu Jurnalizmu sidadania organiza husi AJTL. [Foto: Alberico | 28.06.2022]

Reportajen Adroaldo “Saretukau”

Asosiasaun Jornalista Timor Lorosa’e (AJTL) serbisu ho Perhimpunan Pengembangan Media Nusantara (PPMN) realiza treinamentu, konabá oinsá hala’o atividade journalistic nian ba estudante Komunikasaun Sosiál no Rádiu Komunidade sira, hodi hasa’e sira nia koñesimentu no abilidade atu oinsá halo advokasia ba asuntu feto no ema ho defisiénsia iha períodu eleisaun nian ho tema “Citizen Journalism Training on Gender Perspective and Inclusion, Against Disinformation and Hate Speech in Election Period.”

Prezidente AJTL, Zevonia Vieira iha abertura ba treinamentu ne’e hato’o, treinamentu konaba jornalizmu sidadania ida ne’e hala’o atu sidadaun sira hanesan estudante, ativista, agrikultór ka se de’it bele hala’o atividade jurnalistiku nian, hodi halo advokasia ba eleisaun ne’ebé sei mai iha tinan 2023. Iha treinamentu ne’e foka liu atu oinsá sidadaun ida halo atividade jurnalistiku hodi halo kobertura ba perspetiva jéneru ho inkluzivu iha eleisaun, tanba Timor-Leste foin liu eleisaun prezidensiál no tinan oin ita iha eleisaun parlamentár.

“Entaun iha importante tebes, estudante sira, ativista, sosiedade sivíl, rádiu komunidade, kolega jornalista sira ne’ebé servisu voluntáriu iha online, kbiit ka iha papel ida halo advokasia, halo kampaña konabá oinsá mak ema ho difisiénsia nia partisipasaun ho feto iha eleisaun ne’ebé inkluzivu katak oinsá ema ho difisiénsia iha direitu asesu informasaun konabá eleisaun, oinsá sira bele vota, feto sira ne’ebé vulnerável partisipa iha eleisaun, ida ne’e mak objetivu hosi treinamentu ne’e,” dehan Prezidente AJTL iha treinamentu ne’ebé hala’o iha Sala enkontru Oxfam, Hudi-Laran, 28/06.

Hafoin treinamentu ne’e formandu sira sei hala’o entrevista no hakerek artigu konabá feto, ema ho defisiénsia iha área rural ba sira nia partisipasaun iha eleisaun. Aleinde ne’e, hosi treinamentu ne’e mos bele dada vontade estudante nian ne’ebé iha interese hakarak sai jornalista iha futuru, ba dezenvolvimentu média iha Timor-Leste, dehan Prezidente AJTL, Zevonia Vieira.

Iha parte sorin Diretór Ra’es Hadomi Timor Oan (RHTO), Joazito dos Santos iha nia aprezentasaun ba bareira ka obstákulu sira ne’ebé ema ho defisiénsia, feto vulneravel sira hasoru durante períodu eleisaun, nia dehan hosi ne’e, oinsá mak média nia papél ba halo advokasia iha tempu eleisaun tuir mai, no dada mos atensaun governu nian atu tau kestaun eskluzividade ba ema hotu-hotu.

Diretór ne’e esplika, iha artigu 16 KRDTL ne’ebé ko’alia konaba igualdade no universalidade katak ema hotu hanesan, la iha diskriminasaun ba nia étniku, rasa, relijiaun, tantu ema ne’ebé iha defisiénsia, tanba ne’e governu tenke garante mos ema ho defisiénsia sira nia direitu de votu ka asesu ba iha eleisaun, ne’ebé haforsa mos ho artigu 29 hosi konvensaun direitu ema ho defisiénsia nian.

“Ita mos presiza hatene katak ema ho defisiénsia sira nia kondisaun mak defisiénsia, tanba iha limitasaun iha funsionamentu isin nian, maibé sira nia votu ne’e la’os difisiénsia, i nunka mais ema ida konta votu ne’e ema difisiénsia nian, ida ne’e lae, votus hanesan, i sei konta hamutuk i sei termina ita ni-nia desizaun ba tinan lima ba ita ni-nia lideransa ida” esplika Diretor Joazito ba formandu sira.

Nia hatete, tuir sensus 2015 hatudu ema ho difisiénsia hamutuk 38,118, no dala barak ita hanoin ema difisiénsia la vota maibé lae, sira mos iha direitu hodi hola parte iha festa demokrasia ida ne’e.

Programa treinamentu ne’e realiza tanba AJTL servisu ho Perhimpunan Pengembangan Media Nusantara (PPMN), ne’ebé hetan apoiu hosi USAID iha Jakarta hodi hasa’e koñesimentu estudante Komunikasaun Sosiál no Rádiu Komunidade konaba oinsá halo atividade jotnalístiku nian.

Formandu treinamentu ne’e hosi estudante UNTL, UNPAZ, Rádiu Komunidade sira, jornalista média online no ema ho difisiénsia. Treinamentu refere hala’o durante loron tolu hahú husi loron 28 to’o 30 fulan Juñu. Fasilita treinamentu ne’e hosi AJTL no RHTO.

Print Friendly, PDF & Email

LEAVE A REPLY

Please enter your comment!
Please enter your name here