Reportajen Santina Lucia da Costa
Iha kompetisaun festivál arte no kultura, Prezidente Repúblika, Dr. Francisco Guterres Lu Olo, hateten kompetisaun ne’e balun sei simu taxa Prezidente Repúblika nu’udar rekoñesementu ba sira-nia nia talentu espesiál. Maibé laiha ema ida ke lakon iha kompetisaun, Hotu-hotu manán ho esperiénsia ida-ne’e.
Prezidente Repúblika, Dr. Francisco Guterres Lu Olo, dehan, hein katak ohin ita-hotu bele haksolok hamutuk hodi asiste aprezentasaun dansa tradisionál husi ita-nia ferik, katuas no joven sira ne’ebé sai vensedór iha tinan kotuk. Aprezentasaun múzika rezisténsia husi artista no manan-nain joven sira, sei hamanas ita-nia nasionalismu no patriotismu ohinkalan.
“Hau hein katak partisipante sira, sei haburas liután sira-nia relasaun amizade, ho interese komún atu haburas ita-nia kultura ba beibeik.”tenik, Xefe Estadu, Francisco Guterres Lu Olo, iha nia diskursu iha Palasiu Prezidensial Nicolau Lobato, Bairu-Pite, 30/12.
Lu Olo, salienta tan katak, iha kompetisaun ida ne’e, balun sei simu Tasa Prezidente Repúblika nu’udar rekoñesimentu ba sira-nia nia talentu espesiál. Maibé laiha ema ida ke lakon iha kompetisaun ida ne’e! Hotu-hotu manán ho esperiénsia ida-ne’e.
Lu Olo, hatutan, Ita hein katak kompetisaun arte no kultura bele dudu Governu no entidade sira seluk atu halo investimentu boot iha industria hahú kedas husi eskola ba arte hodi dezenvolve talentu foin-sae sira nian, infraestruturas ba dezenvolvimentu arte nian no ikus mai bele sai produtór ba arte no kultura, laos sai pasivu hodi konsume deit produsaun husi rai-liur nian.
Nia dehan ita hotu mai ho haksolok fó prémiu ba manan-nain sira hahú husi primeiru to’o sestu lugar.
