Reportajen Santina Lucia da Costa
Prezidente Republika realiza Festivál Kompetisaun múzika rezisténsia liuhosi arte no kultura, ho objetivu mak promove no prezerva valores kultural sosiedade ida hodi asegura patrimóniu kultural povu Timoroan
Iha diskursu Prezidente Republika, Dr. Francisco Guterres Lu Olo hateten, Timor-Leste hanesan nasaun independente, ita iha responsabilidade hodi hametin no haburas prinsípiu no valores kulturál Timor oan sira nian. Timor-Leste iha nia prinsípiu no valores ne’ebé forma povu no nasaun ida. Prinsípiu no valores kulturais mai kedas husi bei’ala sira, valores rezisténsia nian ne’ebé ita-nia patriota sira defende no kaer metin hodi luta ba ukun rasik-an no valores ne’ebé mai husi Igreja Katólika ne’ebé hola parte integrante iha forma konjuntura própria identidade Timor-Leste nian.
“Hau nu’udar Prezidente Repúblika iha mehi hakarak haree sosiedade ida moris iha País Timor-Leste ho ninia identidade rasik. Atu alkansa país ida ho sosiedade ida ho ninia identidade rasik, ita presiza esforsu boot ida hodi bele dezenvolve valores sira neébe ita fiar no kaer metin ba.” dehan, Xefe Estadu, Francisco Guterres Lu Olo, ne’ebé partisipa serimonia festivál arte no kultura iha Palasiu Prezidensial Nicolau Lobato, Baitu-Pite, 30/12.
Xefe Estadu, akresenta, Timor-Leste presiza dezenvolve nia-an nu’udar Estadu no nu’udar Nasaun. Dezenvolvimentu laós de’it kona-ba harii infraestrutura fízika no ekonomia maibé importante mós dezenvolve setór sosiál hanesan arte no kultura nu’udar provas katak Timor-Leste iha ninian karáter no sivilizasaun rasik nune’e mós hanesan prinsípiu no valores hodi reflete indentidade povu no nasaun ida nian.
Lu Olo, hatutan, festival no kompetisaun nu’udar forma ida hodi promove no prezerva valores kulturál sosiedade ida nian hodi asegura katak patrimóniu kulturál povu Timoroan nian moris ba nafatin husi jerasaun ba jerasaun.
