Reportajen Santina Lucia da Costa
Prezidente Republika, Dr. Francisco Guterres Lú Olo, halo enkontru ho Partidu Congresso Nasional de Reconstruҫão de Timor-Leste (CNRT) hodi rona opiniaun molok dekreta data eleisaun Prezidensial.
CNRT fó nia apoiu marka loron eleisaun, no CNRT sei kumpri dekretu Prezidente Republika kona-ba data eleisaun.
“Ami mai hasoru Prezidente Republika tanba ami hetan konvite ba konsulta, ami hato’o ba Prezidente Republika CNRT nia pozisaun mak ida de’it, marka loron eleisaun no ami kumpri buat ne’ebe iha, ami mai atu kontribui ba konsulta ne’e.” hateten Terseiru Vise-Prezidente CNRT, Tomas Cabral ba Jornalista sira hafoin enkontru ho Xefe Estadu iha Palasiu Prezidensiál, Nicolau Lobato, Bairu-Pite, 7/01.
Kona-ba kandidatura hodi kompete iha eleisaun prezidensiais, Terseiru Vise-Prezidente CNRT, Tomas Cabral, dehan CNRT iha nia estatutu rasik, labele deside buat ida, konferensia ho kongresu ne’e altu nivel partidu nian mak sei deklara hanesan desizaun partidu nian
“CNRT partidu politiku ida, ami iha bankada Parlamentar ami prontu atu kompete, prontu salva orgaun konstituisional.” Tenik Tomas Cabral.
Entretantu, molok dekreta data eleisaun, Prezidente Republika, tuir artigo 12 husi lei númeru 7/2006, 28 dezembru ho alterasoins susesivas ba lei ne’e, tenke rona uluk governu no partidus politikus ho asentu iha Parlamentu Nasional.
No iha loron 6-7 Janeiro 2022 Prezidente Republika sei rona Partidu Politikus sira ho asentu iha Parlamentu Nasional atu hatene sira nia hanoin kona-ba data eleisaun prezidensial ne’ebé sei akontese, pelu menus loron 60, molo Prezidente Atuál remata ninia mandatu iha 20 Maiu 2022.
