Reportajen Efrem Colo
Ekipa susesu ba kandidatura Prezidente Dr. Francisco Guterres Lu Olo, ohin ofisiálmente ba rejistu ona nia dokumentu eleitorál iha Tribunal Rekursu, hodi prepara ba eleisaun prezidensiál tinan ida ne’e.
Hafoin rejistu ekipa susesu Fernando Dias Gusmão hateten ekipa hosi kandidatura partidu FRETILIN nian rejistu ona iha tribunál no dokumentu sira ne’ebé entrega ne’e prienxe ona lei eleisaun prezidensiál.
“Ami husi ekipa Dr.Francisco Guteres Lu-olo nian, ami lori mai rejista ona ninia kandidatura i hosi Tribunál Rekursu sira dehan dokumentu ne’ebé ami aprezenta maizumenus tuir ona lei eleisaun presidensiál.” Dehan Gusmão.
Nia hatutan ba dokumentu ne’ebé hosi ekipa susesu lori ba aprezenta mak hanesan karta deklarasaun, karta dezignasaun, karta lista asinatura no kartaun eleitorál.
“Ami lori uluk karta deklarasaun aseitasaun, segundu karta dezignasaun ninia reprezentante, terseiru ami lori dokumentu komprovativu lista asinatura, no kartaun eleitorál hosi sidadaun rihun nain sia 9.000.” tenik nia
Fernando Gusmão esplika razaun hatama eleitoral 9.000 deit. tanba atu ajuda tribunál rekursu bele halo verifikasaun lais liu, mais dokumentu ne’ebé mak militante sira no povu tomak entrega ba ami hamutuk rihun atus ida rua nulu resin lima (1.125.00), maibé dokumentu sira ne’e labele lori mai hotu, ami lori dokumentu maizumenus mill 50.00 mil, 40.00 mak orsida tau fali iha karreta, no 9.000 mak hatama tiha ona ba iha tribunál.
