Reportajen Santina Lucia da Costa
Estrutura Lideransa Partidu Demokrátika Cristão (PDC) no membru sira deklara ofisiálmente, hodi apoia Premiadu Nobel ba Paz, Dr. José Ramos Horta ba Prezidente Repúblika ba periodu 2022-2027.
Prezidente PDC Interinu, Domingos da Costa akompaña hosi Sekretáriu Jerál PDC, Francisco de Araújo deklara desizaun apoiu ne’e, sira deside tuir reuniaun Konsellu Diretiva Nasionál (KDN) iha loron 19 Fevereiru 2022 hodi apoia kandidatu Ramos Horta.
“Partidu PDC ho estrutura másimu hosi nivel nasionál to’o suku apoia totálmente kandidatu Dr. José Ramos Horta,” Hateten, Prezidente Interinu PDC, Domingos da Costa, liuhosi deskursu, iha edifisiu PDC, Bairru-Pite Dili, 27/02.
Prezidente PDC akresenta estrutura PDC konsidera haree no observa katak, iha fatór importante lima (5) ne’ebé kesi metin hodi apoia Ramos Horta ho razaun Horta iha kapasidade diplomasia nivel altu no koñesidu iha mundu interasionál iha prosesu luta ba ukun rasik-aan no to’o agora mundu sei fiar nafatin Horta nu’udar premiadu Nobel da Paz.
Sira mos deha Horta iha esperiénsia hanesan Eis-Prezidente Repúblika periodu 2027-2012 ne’ebé konsege hamutuk ho Kay Rala Xanana Gusmão rezolve krize polilitika militár iha tinan 2006/2007 no hadia hikas ekonomia Timor-Leste. Haat, Horta nu’udar Lider Mundial hodi okupa pozisaun nu’udar Membru Konsellu Seguransa iha Organizasaun Nasoes Unidas (ONU) no Reprezentante Espesiál ONU ba iha Guinea-Bissau. Lima, Bele repozisaun Konstituisaun RDTL no hadia imajen TL iha mundu tomak no kria kooperasaun di’ak ho nasaun membru ASEAN.
Iha fatin hanesan, Premiadu Nobel da Paz, José Ramos Horta hato’o agradese ba apoiu ne’e no hein lideransa partidu no membru sira hodi vota iha loron 19 de Marsu 2022 iha númeru surteiu 14 ho fotografia Horta no Xanana nian.
“Imi ba vota labele sala, haree buletin votus ne’e hahú hosi okos, hau nia númeru 14,” dehan Horta.
Horta konsidera númeru surteiu 14 ne’e, númeru ne’e maka refleta ba Nai Jesus Kristu nia istória nia mate no númeru resureisaun ba sarani Katolika hodi hamutuk hodi fila-fali imajen nasaun Timor-Leste.
Horta dehan, Timor-Leste presija hametin fila-fali estadu direitu demokratiku ho loloos no hadia hikas ekonomia Timor-Leste labele monu ba bebeik no hasa’e kresimentu ekonomia hodi redús kriano buka rezolve problema juventude no estudante sira iha Timor-Leste.
