Reportajen Santina Lucia da Costa
Kandidatu Prezidente Repúblika ho númeru sorteiu 6, Dr. Francisco Guterres Lú Olo hamutuk ho Sekretáriu Jerál FRETILIN lansa sede kampaña kandidatura Lú Olo, hodi fó espasu ba ekipa susesu kandidatu Lú Olo bele serbisu no akompaña kompromisu ho situasaun polítika enjeral iha pais ida ne’e.
Intervensaun kandidatu Prezidente Republika, Dr. Francisco Guterres Lú Olo, hateten kandidatu Prezidente Repúblika, Dr. Francisco Guterres Lú Olo Abertura ba Sede Kampaña nian, hetan espasu ne’e para hodi bele grupu apoiu ba kandidatu sira sei serbisu iha ne’e, no mós atu bele akompaña komprimisu rasik ho situasaun politika enjeral iha nasaun ne’e.
“Hau mai hamutuk ho imi dala ida tan para halo abertura ba sede kampaña Prezidente Republika nian iha fatin ida ne’e, odamatan nakloke ona, ora-oras tan ita sai husi fila-fali odamatan ida ne’e, para ita hasoru malu ho ita nia povu iha Munisipiu sira hotu-hotu. Ita hotu Hamutuk ho hau nu’dar kandidatu ba Prezidente Republika ita hakat dala ida tan, para atu lori hau sai Prezidente Republika ba tinan lima tan mai oin.” Hateten, Kandidatu Prezidente Republika, Dr. Francisco Guterres Lú Olo iha ambitu lansamentu sede Kandidatu Lú Olo iha Luz Clarita, Formoza, Dili, 28/2.
Lú Olo fó obirgadu barak ba konfiansa ida ne’e, konfiansa boot husi Partidu FRETILIN ninian ho nia lideransa tomak, ikus mai Partidu ne’e rasik ratifika apoiu ida ne’e liuhusi ninia rezolusaun ida, rezolusaun komisaun politika nasional nu’udar orgaun sentral partidu nian.
“Hau agradese ho hau nia laran haksolok boot teb-tebes bainhira iha loron 16 Janeiru 2022, hau nia deklara hau nia-an ba publiku atu sai kandidatu ba Prezidente Republika, bainhira hau deklara ba publiku katak, hau sai Prezidente Republika, Dr. Marí Alkatíri nu’udar orgaun partidu FRETILIN ninian biar nia iha tasi balun maibé nia mensajen lori mai kedas hodi deklara ho FRETILIN nia naran hodi apoiu total, Kompletu no inkodisional ba hau nia kandidatura.” Dehan, Lú Olo.
Lú Olo sente seguru teb-tebes bainhira sai kandidatu dala ida tan ba Prezidente Republika, simplesmente tanba Lú Olo la la’o mesak ida, tuir Lú Olo nia ain fatin mak kamarada sira iha ne’e sei barak, sei barak mós iha Munisipiu, Suku, Aldeia sira hotu, ne’ebé oras ne’e dadauk sira prepara hela para atu hasoru malu dala ida tan hodi rona direitamente Lú Olo nia lian ba sira.
Nia realsa tan katak, Kampaña kandidatu Prezidente Republika, Dr. Francisco Guterres Lú Olo sei hahú iha Oecusse/RAEOA, Pante Macassar, Oebau Pante Macassar iha loron 2 Marsu 2022, Oras 14:00-18:30 Lokraik.
Entretantu hetan partisipasaun iha lansamentu ne’e mak partisipa husi Vise Prezidente Partidu PLP, Prezidente Partidu Os Verdes ho nia estrutura sentrais, Reprezentante Konselleiru partidu KHUNTO, Sekretariu Jeral OPMT, Juventude FRETILIN nian, no organizasaun sira seluk.
