Reportajen Joselina dos Santos
Relasaiona ho Karta Notifikasaun husi Polisia Cientifika Investigasaun Criminal (PCIC), ne’ebé maka halo notifikasaun Ba jornalista jornal Diariu Indepeden Domingos Gomes ho Xefi Redasaun Jorgino dos Santos ne’e, Asosiasaun Timor-Leste Press Union (TLPU), Husu ba Jornalista sira atu apoiu nafatin ba maluk jornalista sira atu nafatin defende ba liberdade Imprensa no liberdade espresaun hodi hametin nafatin estadu demokratiku, karik prosesu ne’e mak la’o nafatin hamutuk hodi halo manifestasaun hodi hasoru Autoridade sira ne’ebe hakarak kontra jornalista sira bainhira defende servisu profisional liu-liu ba Polisia Cientifika Investigasaun Criminal (PCIC) tanba Jornalista la halo krime.
Sekretariu Jeral Asosiasaun Timor-Leste Press Union (TLPU), Zenito da Silva hatete, orseik simu informasaun husi Jornal Indepedente no sira halo analiza ba karta ne’e katak dirije ba individu maibé laos dirije ba Jornal Diariu Indepedente entaun iha konteudu ne’e katak palsifikasaun Dokomentus.
“Ami ohin akompña ba kolega na’in-rua iha PCIC depois iha ambitu inkeritu ne’e labazeia ba karta notifikasaun ne’ebé hato’o, maibé liga fali ba notifikasaun anteriôr kona-ba publikasaun notísia husi jornal independente, ida ne’e ami hanoin katak Autoridade seguransa sira halo Investigasaun ba ema ne’ebé lamerese atu fó informasaun, tanba sé ko’alia kona-ba jornalista entaun jornalista durante ne’e la halo krime nune’e karik sira sente preokupadu ba publikasaun entaun tenke liu husi lei komunikasaun sosial iha artigu 2 linha f ne’e klaru”, dehan, Sekretariu Jeral Asosiasaun Timor-Leste Press Union (TLPU), Zenito da Silva ba jornalista iha Edifisu PCIC Kolmera, sexta 23/12.
Nia Dehan, Aktus ka jornalista ne’ebé mai prezensa iha PCIC ne’e amiasa boot ba liberdade imprensa iha Timor, tanba ema hotu hatene katak relatoriu ne’ebé publika iha mundu katak liberdade Imprensa ne’e diak no iha numeru 17 iha Aziatiku, maibé tentativa ne’ebé dadaun ne’e Autoridade sira halo ne’e amiasa boot ba jornalista sira no nia implikasaun ne’e mós ba estadu Timor-Leste.
“Ami husu ba Autoridade Seguransa sira hodi hapara aktus sira hasoru jornalista sira liu-liu PCIC tenke haree katak karta notifikasaun ne’ebé haruka ba individu ne’e tenke inkeritu ho ema indívidu, labele liga fali ba publikasaun jornalista sira nian tanba jornalista servisu bazeia ba lei komunikasaun sosial no Kodigu étika jornalistika”, nia akresenta.
TLPU Husu ba Jornalista sira atu apoiu nafatin ba ita nia maluk jornalista sira atu nafatin defende liberdade Imprensa no liberdade espresaun hodi hametin nafatin estudu demokratiku, karik prosesu ne’e mak la’o nafatin sei halo manifestasaun boot ida hodi hasoru Autoridade sira ne’ebé hakarak kontra jornalista sira bainhira defende servisu profisional.
