Home Meio Ambiente Inundasaun Tasi Tolu, Xéfe Suku Madohi Husu Ministériu Kompetente, Iha Planu ba...

Inundasaun Tasi Tolu, Xéfe Suku Madohi Husu Ministériu Kompetente, Iha Planu ba Dezenvolvimentu, Antisipa Duke Remediar

1197
0
PNTL fo tulun ba komunidade afetadu (Foto: Adro Serutukau)

Reportajen Adroaldo “Serutukau” Almeida

“Ba ita nia governante ka ita nia ministériu kompetente sira, kuandu iha planu ba dezenvolvimentu ne’e, presija antisipa antes duke remediar hanesan akontese da-dauk,” Xefe Suco Madohi, Bernadino de Cristo Fereira esplika.

Bernadino mos expresa ninia sientementu tauk ba situasaun ne’e. Nia konta tuir ninia esforsu sira hodi husu ajuda ba governo no kompania. Nia mos lamenta ho hahalok destruidu komunidade nian.

“Akontesimentu ne’e ita haree nia konsekuénsia ita ta’uk tebe-tebes, tanba antes de hahú projetu ne’ebá ne’e, hanesan dever ida ha’u fó hatene antes, tantu debate governu nian, ha’u hasoru direitamente ho kompañia oinsá mak kompañia ho governu sira loke hela espasu ida ba bee dalan. Agora ita nia komunidade triste hanesan ne’e,” Bernadino haktuir ba jornalista neonmetin.info iha fatin inundasaun, Tasi Tolu, 23/01.

Nia observa katak tinan-tinan akontese, aldeia rua mak risku liu. Aldeia ida ne’e mak todan liu, tuir aldeia rozáriu. Aldeia hotu-hotu risku maibé ladun forte. Todan liu la signifika katak, ita la iha meius mak todan lae, tanba ita nia destruidu.

“Momentu ne’e ita prevene katak, udan tuun mai karik bee halai oinsá. Parte seluk mós ita ko’alia ambiente saúde en relasun ho seluk. Ne’ebé presiza ba oin ne’e, liu-liu ba ita nia governante ka ita nia Ministériu kompetente sira, kuandu iha planu ba dezenvolvimentu ne’e, presiza antisipa antes duke remediar hanesan akontese da-dauk,” Bernadino lamenta.

Sekretáriu de Estadu Protesaun Sivil, Alexandrinho Araújo esplika katak iha tempu akontese nia tékniku sira sei foti dadus. Maibé aldeia ida ne’e kuaze bee nakonum, só dadus serteza ne’e Xefe Aldeia ho Xefe Suku mak hatene, maibé atu dehan ne’e atus ba leten mak afeita.

“Primieru povu sira mak afetadu ba dezastre ida ne’e, ita buka meius para halo evakuasaun ba fatin seguru. Segundu foti lista sira hotu nian. Depois ita apoiu emerjénsia hanesan ai-han ho buat sira seluk no importante muda tiha sira ba mahon,” Alexandrinho esplika.

Hosi horiseik kuaze família 40 mak muda ona ba sentru evakuasaun iha Komoro. Amu pároku Komoro prontu simu evakuasaun ba iha ne’ebá.

Sekretariu Estado ne’e mos hatete katak, “Maibé konforme povu sira nia konsiénsia, balu hakarak muda no balu ami tenki ser muda obrigatóriu. Tanba ita haree orsida kala bele udan, loraik bele udan. Entaun ita tenki iha prevensaun agora, tanba ne’e bombeirus sira ami avizu para hodi sira hotu evakua no ami kontaktu ho polísia sira atu estenbai iha ne’e.”

Problema boot ita hasoru mak bee, entaun ita kopera ho Obras Públikas, agora sira servisu da-dauk, oinsá ke’e tiha bee dalan hodi normaliza tiha bee ne’e.

Horiseik ekipamentu bombeirus mós limitadu, maibé ami paoiu máksimu, bombeirus, dezastre natural ho Protesaun Sivil tomak tun. Saída mak ita iha mak Bero boraxa, para atu ajuda ita nia inan feton sira, oan sira no sira ne’ebé iha bee laran sai mai hodi lori ba fatin ne’ebé seguru.

Alexandrinho mos esplika katak, “Apoiu primeiru emerjénsia hanesan bai-bain, segundu iha ai-han direita hosi Ministériu balun ne’ebé prepra hela hahan, hosi Sekretária Estadu Igualdade no Inkluzaun. Vise Mnistra Saúde mos mai direita haree fatin ne’e, tanba situasaun sira hanesan ne’e iha mós ema moras, entaun ita kopera, au mezmu tempu Ministru Estatal atu kopera ho autoridade lokal sira, para atu bele fó dadus sira, para atu bele fó dadus sira karik afetadu balun ita bele haluha.”

Rosa Madeira Barreto, membru komunidade afetada BTN 3, Tasi Tolu, konta tuir oinsa bee nakonun no tama ba sira nia uma. Nia mos dehan katak antes situasaun ne’e akontese Xefe Suku mai haree bee lao fatin la iha maibe la halo buat ida.

“Iha kalan ne’e ami sente labele ona, bee sa’e tiha to’o ami nia kakorok, sorti ami sai selae karik ami mate. Udan mai primeiru ne’e ami seidauk sai. Kalan ne’e udan mai la para entaun bee sa’e ona. Kalan boot ami toba kala tuku 2 hanesan ne’e, bee tama to’o ami nia fatin, bee sa’e to’o tiha ami nia kulsaun, entaun ami tenki sai,” Rosa konta tuir.

“Ami nia sasan uma laran, bikan, kanuru ropa ho sasan uma laran seluk bee lori hotu. Ami mak sai de’it, ami la aproveita buat ida, ami sai ho pasta ho dokumentu de’it, buat seluk la hasai,” Rosa hatutan ho triste.

Rosa mos expresa nia satiadu ba autoridade komunitaria tanba la tau atensaun ba bee lao fatin.

“Fatin ne’e uluk xefe suku mai haree dunik maibé ladun interese ida. Atu mai ke’e kanu ka halo valeta mós la iha. Sira mai haree de’it mak ne’e ona la halo buat ida. Ami povu mak tinan-tinan terus ba bee ne’e nafatin. Xéfe suku sira la dun interese povu sira ida, ne’e mak ami terus nafatin ho udan boot,” Rosa expresa.

Print Friendly, PDF & Email

LEAVE A REPLY

Please enter your comment!
Please enter your name here