Reportajen Silvino Freitas
Primeiru Ministru (PM), Taur Matan Ruak manifesta solidariedade ba povu Ukranianu ne’ebé invade husi militár Russia, no apela ba mundu atu buka solusaun pasifika, tanba Timor mos iha ona esperiénsia ho invazaun hanesan, ne’ebé fo impaktu negativu ba vida ema no nasaun.
“Antes ita atu kontinua, hau hakarak lembra ita boot sira, hodi ita manifesta ita nia solidariedade ba funu iha Ukraine ne’ebé Rusia invade, Timor-Leste hanesan nasaun ida ne’ebé iha esperiénsia okupasaun no invazaun husi Indonesia entaun timor leste nia pozisaun kontra kualker invazaun” dehan Taur iha ambitu komemorasaun loron veteranu iha Kuartel-Jeral Fatu-hada,(03/03).
Nia hatutan invazaun Russia ba Ukraine lori sortimentu ba povu Ukranianu sira hanesan ferik-katuas, labarik-kiik, feto sira tanba iha istória Timor nian, ba luta libertasaun enfrenta mos situasaun hanesan povu Ukranianu enfrenta.
“Tamba ne’e ita apela ba mundu atu buka solusaun pasifika, ba konflitu ida ne’e hodi evita lakon no ema mate, tanba ema nia vida la fa’an no la sosa iha merkadu “nia hakotu.
