Reportajen David da Costa Gusmao
Komisaun Nasionál Elisoens (CNE), José Agustinho Belo informa konaba votasun ba ema ho difesensia ne’e lao nafatin, maibe votasaun ne’e sei apoiu husi família, Komisaun Nasionál Elisoens (CNE) no Sekretáriu Tékniku Administrasaun Estatál (STAE).
“Konaba votasaun ba ema difesensia hau hanoin lao nafatin mesmu sira la uza ekipamentu ne’ebé sira iha, tanba kestaun de tempu preparasaun, maibe ba iha eleisaun iha futuru bele hadia,” hateten Prezidente CNE José Agustinho Belo ba Neon Metin iha CNE, Sexta 4/03.
Nia dehan sira nafatin vota, tanba lei dehan sira bele vota, no família ne’ebe sira fó konfiansa bele lori ou se lae husi parte ajensia elitorál sira ne’ebé ajuda sira, para bele ba vota tuir sira nia konsensia.
Nia dehan difesensia sira ne’e CNE fó prioridade primeru ba sira para bele vota, tratamentu ida ne’e maka bele fó sira, sira sei hetan tratamentu espesifiku ba sira atu nune’e sira bele asesu lalais atu bele vota.
“Hau hanoin sira ne’ebé difesente, liuliu ba sira difesensia matan ne’e, letra braille sei iha hela sistema, ne’ebe iha futuru ita bele hadi ida ne’e, atu nune’e bele fasilita sira ema ho difesensia matan ne’e,” Tenik nia.
Nune’e ba pasiente sira iha ospitál, lei asegura hela katak sira iha ospitál kuandu hato’o ona lista ema moras ne’e, sei loke mós centru votasaun movel ida iha ospitál para ajuda sira hodi bele vota, inklui sidadaun sira ne’ebe iha hela kadeia
