Reportajen David da Costa Gusmao
Portavoz Brigada apoiu kandidatu Prezidente Republika Martinho Gusmao, Matias Amaral Ramos informa sei esforsu makas, atu tun ba baze hodi influensia komunidade ka tama sai uma, hodi husu apoiu povu ai-leba sira, atu fó sira nia votus tomak ba kandidatura PR Martinho Germano Da Silva Gusmão.
Tanba kandidatura Prezidente Repúblika (RP), Martinho Gusmão ne’e mai ho kometimentu ida katak uluk nia sei Padre oferese nia an tomak hodi servi sarani tomak, agora nia foti desizaun atu sai ona aman ba povu tomak, ne’ebe ho fiar-an tomak katak Povu Timor-Leste sei fó fiar nian iha loron 19 Marsu hodi eleitu nia ba Presidente RDTL 2022-2027.
“Ami husi Brigada apoiu Martinho , konsidera kandidatura Martinho Gusmão hanesan Jerasaun Foun ne’ebe iha kapasidade, no nia kandidatura ne’e hetan autorizasaun direita husi vatikanu no hanesan Padre Dispensadu Laos Demisaun. Kandidatura ne’e ami konsidera hanesan uma kreda nia ema ne’ebe seidauk komete erru ka sala ruma iha rai ida ne’e,” dehan portavoz Matias Amaral Ramos liuhosi konferensia imprensa iha jardin 5 Maio, Sexta 4/03.
Nia haktuir sira apoiu kandidatu Martinho Gusmão, tanba nia iha pensamentu no fo atensaun makas liu ba iha revolusaun edukasaun, liliu ba eduksaun baziku no sei hatu’ur hikas lei no konstituisaun iha nia fatin. Konsidera kandidatu ne’e hanesan jerasaun foun, ne’ebe ho figura internasional ne’ebe fasil tebes atu halo relasaun bilateral no multilateral.
Nia hatuta kandidatu ne’e mós iha abilidade koalia lian estranjeiru 12, liu-liu lian Portuguese, Ingles no Indonesia. Kandidatura ne’e ema ida ne’ebe hatene servi ho fuan ho laran tomak ho pasensia, hakraik an no hadomi ninia Povu hanesan nia an rasik. No kandidatu prontu atu sai aman ba nasaun nian sei la hare ba Kór, Rasa, Relijiaun no Étniku.
