Reportajen Santina Lucia da Costa
Kandidatu Prezidente Repúblika nú.sorteiu 12, Virgilio da Silva Guterres “Lamukan” halo kampaña ho tipu diálogu komunitáriu, antes hahú dialogu Lamukan fó onra ba Fernando Lasama de Araujo tanba Lasama nu’udar mestre polítiku, hanorin Lamukan iha Indonesia oinsá atu hadomi rai ne’e, no oinsá atu luta defende ba autó-determinasaun.
“Hau mai Ainaro tau duni Kamizola Lasama atu fó onra nia Manutasi oan ida, nia aman la’os FRETILIN hanesan hau, hau ema FRETILIN, Fernando Lasama de Araujo la’os ema FRETILIN nia oan, hau lahatene posivelmente nia APODETE nia-oan, mais nia mak hau nia mestri politiku nia mak hanorin hau iha Indonesia oinsa atu hadomi rai ne’e, oinsa atu luta defende diretu ba auto-determinasaun, tanba ne’e ohin hau hamriik iha Ainaro hodi fó onra ba nia, hakruk ba nia.” hateten, Kandidatu PR, Nú.sorteiu 12, Virgilio da Silva Guterres “Lamukan” iha Aitas, Ainaro, 10/3.
Lamukan Agradese ba povu Ainaro tanba hahoris oan mane ida ne’ebé importante teb-tebes iha luta, oan mane ne’ebé ké hadomi nia rai laiha rezerva, triste tanba nia ba mundu seluk sedu liu teb-tebes, maibé nia obra husik hela, Partidu Demokratiku (PD) la’o hela. “Bainhira hau liu iha Ainaro hau sempre hakruk ba nia.”
