Reportajen Calisto dos Santos Oqui
“Hau nu’udar joven ida labele vota tuir kandidatu ne’ebé sira mai promete deit, maibe ita tenke haree nia kapasidade ne’ebé diak atu hodi Timor ba oin, hau hakarak Prezidente foun halo netik buat diak mai ita, maibe realidade povu sai vitima nafatin”. Lusiana
Kandidatu Prezidente Repúblika, Virgílio da Silva Guterres Lamukan halo diálogu ho komunidade iha Aldeia Terus Nain, hateten bainhira sai Prezidente hare ba buat tolu mak matan atu haree sosiedade povu nian, tilun atu rona povu nia halerik no nia lian, no povu nia lamentasaun.
Nia mos dehan Prezidente tenke sai ibun, atu hateten ba governu Orsamentu Jerál Estadu ne’e osan pov nian, laos Ministru ka Prezidente nian. Sei povu nia osan tenke hadia povu ninia moris, tenke harii postu saúde iha suku, atu nune’e ita nia populasaun bele asesu ba saúde, hanesan estrada sae mai mos hanesan ambulansia atu mai mos susar.
Nia dehan suku hotu tenke estrada iha estrada diak, nune ambulansia katak wainhira ita nia inan feto sira moras tenke asesu lalais bombeiros, bainhira akontese ahi han uma ķarik bele asesu ho lalais.
“Ķarik imi fó fiar mai ita,ita sei implementa buat ne’ebé mak hau mensiona ona”, dehan Lamukan iha Ailok Laran, 14/03.
Iha fatin diálogu juventude Lusiana de Jesus dehan katak, “hau nu’udar joven ida labele vota tuir kandidatu ne’ebé sira mai promete deit, maibe ita tenke haree nia kapasidade ne’ebé diak atu hodi Timor ba oin, hau hakarak Prezidente foun halo netik buat diak mai ita, maibe realidade povu sai vitima nafatin”.
Nia husu ba maluk joven estudante no kolega sira karik ba tuir kampaña tenke rona sira nia programa, laos ba buka rame deit, ķarik ita buka rame deit ita ki’ik, kiik nafatin, boot sira boot nafatin, husu ba maluk kolega sira vota ba jerasaun foun atu lori nasaun ba oin.
Nia hato’o mensajen ba kandidatu Prezidente Repúblika katak seķarik sai Prezidente tenke lao tuir programa ne’ebe iha, tanba tinan barak nia laran povu kontinua sofre.
