Reportajen Joselina dos Santos
Juventude husi ekipa Voluntariu Uma Vitoria Assanami (UVA) hato’o sira nia ksolok wain ba selebrasaun loron Damen no Domin nian ba juventude no populasaun sira hotu iha territóriu Timor laran.
liuhusi konferénsia imprensa, Porta Voz Pedro Ximenes hatete ohin realiza atividade ida ne’e ho objetivu loron domin ne’ebe monu iha loron 14 Fevereiru. Loron ohin ne’e, populasaun tomak iha mundu, liu-liu foin sa’e sira selebra loron espesiál domin ka Valentine Day, ho sentimentu ksolok nian.
“Foinsa’e sira iha Timor-Leste aproveita loron ne’e hodi hatudu sentidu domin no dame ba malu,” Dehan Porta Voz Pedro Ximenes ba Jornalista sira Iha Uma Vitoria Assanami Mandarin, 14/02.
Nia dehan liga ba situasaun ikus-ikus ne’e iha Timor-Leste, mosu violénsia ne’ebe fo mos impaktu ba sentidu domin no damen entre Timor oan rasik.
“Nu’udar foinsa’e, ita presiza sai nu’udar promotor ou autor ba kriasaun domin no dame iha sosiedade nia leet. Ita hotu orgullu ho ita nia rain, nu’udar nasaun foun ida ne’ebe mai ho lema ida katak Adeus Konflitu Benvindu Dezenvolvimentu. Ho tema ida ne’e ita hakarak hakiak paz, dame no hakmatek nune’e dezenvolvimentu bele la’o ba to’o objetivu ida povu nia moris di’ak no prósperu,” nia esplika.
Nia hatuan, iha tinan ida ne’e Timor-Leste sei hasoru festa demokrasia iha Eleisaun Prezidensial, tan ne’e nu’udar ekipa voluntáriu Assanami husu ba Timor oan tomak, liu-liu ba Juventude sira ne’ebe mak sai ai-rin ba nasaun, no sai save importante ba determinasaun dezenvolvimentu nasaun, atu haburas nafatin dame iha família, sosiedade no nasaun.
“Festa demokrasia eleisaun prezidensial, ita hotu sei partisipa ho kontenti no ksolok hodi hametin demokrasia. Tan ne’e, ita preisiza hakiak domin no dame, ho ida ne’e mak sei lori rezultadu diak ba hametin estadu direitu demokrasia,” hateten nia
Nia dehan joven mak tenke sai motivador, inspirador ba paz iha ita nia rain. Liu hosi asaun fahe ai-funan iha loron domin ne’e nu’udar simbolu domin no dame ba ita hotu. Iha mos atividade seluk ne’ebe ami kontribui mak tulun komunidade iha Bebora (ne’ebe foin lalais iha labarik kiik mate tanba moras dengue).
Nune’e ekipa voluntariu Assanami hakarak hato’o mensajen simples ida katak, “Ami nia dame ho imi, ami nia domin ho imi, no imi nafatin iha ami nia fuan tanba bainhira iha domin sempre iha mos dame” atu nune’e ita bele respeita malu ho unidade.
