Reportajen Adroaldo “Saretukua”
Kandidatu independente ba Prezidente Repúblika, Virgílio da Silva Guterres “Lamukan” hato’o nia mensajen ba eleitór sira iha munisípiu Manufahi, relasiona ho nia kampaña eleitorál ne’ebé la hala’o ho povu sira iha ne’ebá, tanba la iha rekursu atu organiza sorumutu ruma ho sira, nune’e la iha biban hodi fahe nia kompromisu polítika nu’udar kandidatu PR 2022-2027.
Iha karta aberta ne’ebé publika iha nia konta privada Facebook hato’o ba inan-feton, maun-alin no povu rai Asswa’in Manufahi katak la iha ona biban hodi hato’o nia kompromisu polítika direita ho povu Manufahi maibé kandidatu independente ne’e espera eleitór sira sintoniza de’it iha frekuénsia Rádiu Komunidade Manufahi (1912) hodi rona nia kompromisu liu hosi entrevista ne’ebé Jestor RCM 1912, Vasco Mendes halo ho kandidatu Lamukan iha loron 10 Marsu, 2022.
Lamukan hatutan liu hosi entrevista ne’e ha’u hakru’uk hodi hahi’i no haktane As’wain sira rai maun-fahe nian, hahú hosi D. Boa Ventura, Borja da Costa, Raul Isaac, Moisés Amaral ho sira seluk tan nebe fakar-ran, halekar-ruin hodi satan ita nia rain no lori ba ukun-rasik-an.
“Ha’u nia kompromisu ba Manufahi, bainhira sai Prezidente Repúblika mak oinsá dudu governu atu promove Manufahi nu’udar fatin turizmu istóriku no aventura. Turizmu istóriku tanba iha Manufahi mak jerasaun foun sira bele hetan ain-fatin ikus asswa’in sira nian. La’os de’it D. Boaventura nian, maibé mos Nicolau Lobato, Hamis Hatta, Bie Ki Sahe, Raul Isaac, nsst tan. Munisipiu Manufahi nu’udar fatin fakar-ran no halekar-ruin nian. Fatin batalha nian,” dehan Virgílio liu hosi Facebook, Segunda, 14/03.
“Fahi-nehan nia laletek halo Borja da Costa sadik foho Ramelau nia aas, “sa be aas liu ó tutun, sa be beik liu ó lolon”, maibe “tansa timoroan hakruuk be-beik, tansa timoroan atan bebeik?” Rotutu nia furak hamatak rai ho nia we-mos ne’ebé suli la para tenki sai fonte promosaun ba turizmu aventura,” tenik kandidatu ho númeru sorteiu 12 ne’e.
Lamukan hato’o atu iha loron 19 Marsu, hili ema ne’ebé bele tulun konkretiza hanoin sira ne’e. Hili Prezidente ne’ebé tulun governu atu halo dezenvolvimentu. Dezenvolvimentu atu hadi’a povu nia moris di’ak. Labele hili sira ne’ebé sai autor ba krizi politiku-militar, autor ba impase polítiku, hun ba estadu emerjénsia. Labele hili Prezidente ne’ebé buka trava de’it governu atu halo dezenvolvimentu.
Virgílio husu eleitór sira iha rai Maun-fahe, dadolin-na’in no hakerek-na’in sira, Borja da Costa, Luis da Costa no Luis Cardoso de Noronha nia rain, tempu ona atu hili jerasaun foun hodi lori hanoin foun ba ita nia rain. Hanoin domin nian, hanoin dame nian no hanoin ba futuru.
“Hanesan hakerek-na’in Manufahi oan Luis “Takas” Cardoso dehan: Jornalista Virgilio mak ha’u nia kandidatu prezidensiál. Bainhira sei iha funu entre MUTIN ho MEAN, ha’u akonsella vota ba ema independente. Vota ba dame no futuru,” Lamukan sita hakerek na’in Luis ne’ebé hato’o nia parabéns ba nia.
Iha 19 Marsu imi tenke hili ema ne’ebé prontu atu serbi no serbi tuir povu nia hakarak. La’os tuir partidu politiku nia hakarak ka tuir ida ne’ebé tula-liman nia hakarak. “Ha’u Kandidatu PR nebe hakarak lori ukun atu serbi Povu, la’os halo Povu sai atan ba poder. Ha’u nia lema mak ‘Ba Timor-Leste Ida Fraternu Liu’. Timor-Leste ida de’it, Timor-Leste ida ne’ebé ita haree malu nudar inan-feton no maun-alin. La iha ódiu-malu no vingansa,” dehan Virgílio.
