Reportajen Adroaldo ‘Saretukau’
Kandidatu independente ba Prezidente Repúblika, Virgílio da Silva Guterres ‘Lamukan’ hato’o nia mensajen ba eleitór sira iha munisípiu Manufahi, katak wainhira eleitu ba Prezidente Repúblika sei rekomenda harii ospitál referral iha munisípiu hotu no apoia halo desentralizasaun ba munisípiu no postu hotu ne’ebé inklui ho sira nia osan rasik.
Kandidatu Virgílio ho númeru sorteiu 12 iha nia konta Facebook ba eleitor sira iha munisípiu Manufahi katak “ha’u kandidatu Prezidente Repúblika ne’ebé eleitu hakarak rekomenda ba governu atu harii ospital referal iha munisípiu hotu-hotu hodi fasilita populasaun asesu ba servisu saúde nian,” dehan Virgílio.
Iha sorin seluk Lamukan dehan wainhira eleitu, sai mos prezidente ne’ebé apoia prosesu desentralizasaun podér ba munisípiu no postu administrativu, maibé desentralizasaun ne’ebé tenki akompaña mos ho desentralizasaun jestaun finansas nian.
“Desentralizasaun poder lokal só bele la’o bainhira desentraliza mos jestaun finansas nian. Desentralizasaun jestaun finansa sei hasa’e autoridade responsável makaer ukun lokal sira nian,” dehan Virgílio “Lamukan”
Virgílio akresenta, dadaun ne’e, povu munisípiu Manufahi sai ona ezemplu oinsá hili no satan sira nia ukun-na’in. Povu Manufahi hatudu katak, ema ne’ebé kaer ukun tenki utiliza ukun ne’e atu serbi povu. Hanesan atual Administrador munisípiu Manufahi. Maski governu sentral hanoin atu troka ho ema seluk, maibé povu Manufahi unidu no firmi hakarak mantein.
Lamukan hato’o atu iha loron 19 Marsu, hili ema ne’ebé bele tulun konkretiza hanoin sira ne’e. Hili Prezidente ne’ebé tulun governu atu halo dezenvolvimentu. Dezenvolvimentu atu hadi’a povu nia moris di’ak. Labele hili sira ne’ebé sai autor ba krizi politiku-militar, autor ba impase polítiku, hun ba estadu emerjénsia. Labele hili Prezidente ne’ebé buka trava de’it governu atu halo dezenvolvimentu.
Virgílio husu eleitor sira iha rai Maun-fahe, dadolin-na’in no hakerek-na’in sira, Borja da Costa, Luis da Costa no Luis Cardoso de Noronha nia rain, tempu ona atu hili jerasaun foun hodi lori hanoin foun ba ita nia rain. Hanoin domin nian, hanoin dame nian no hanoin ba futuru.
“Hanesan hakerek-na’in Manufahi oan Luis “Takas” Cardoso dehan: Jornalista Virgilio mak ha’u nia kandidatu prezidensiál. Bainhira sei iha funu entre MUTIN ho MEAN, ha’u akonsella vota ba ema independente. Vota ba dame no futuru,” Lamukan sita hakerek na’in Luis ne’ebé hato’o nia parabéns ba nia.
Iha 19 marsu imi tenki hili ema ne’ebé prontu atu serbi no serbi tuir povu nia hakarak. La’os tuir partidu politiku nia hakarak ka tuir ida ne’ebé tula-liman nia hakarak. “Ha’u Kandidatu PR nebe hakarak lori ukun atu serbi Povu, la’os halo Povu sai atan ba poder. Ha’u nia lema mak ‘Ba Timor-Leste Ida Fraternu Liu’. Timor-Leste ida de’it, Timor-Leste ida ne’ebé ita haree malu nudar inan-feton no maun-alin. La iha ódiu-malu no vingansa,” dehan Virgílio.
Nu’udar Kandidatu ida hosi kandidatu 16, ha’u nia numeru sorteiu 12. Numeru juventude nian (12 novembru 1991), númeru asswa’in nian (Revolta D. Boaventura 1912), Lamukan hakotu.
