Reportajen Santina Lucia da Costa
Xefe Suku Uatu-Haco Crisóstomo Correia ho esperansa katak, kandidatu Prezidente Republika na’in 16, karik ida mak eleitu ba Prezidente Republika ba tinan 2022-2027, tenki tau matan ba Bee-Moos ho Estrada tanba ukun-an tinan 20 resin ona, maibé povu kontinua halerik ba bee-moos no estrada.
Suku Uatu-Haco kompostu husi aldeia haat mak hanesan, Lia-Bala, Osogori, Uatu-Hasa, no Uaitalibu’u ne’ebé lokaliza iha Postu-Administrativu Venilale, Munisipiu Baucau.
Xefe Suku Uatu-Haco Crisóstomo Correia, hateten, Entre kandidatu Na’in 16 ne’e povu prontu fó sira nia votus, no povu hein ida mak eleitu ba Prezidente Republika, promesa sira ne’ebé durante halo iha kampaiña eleitoral ne’e, povu hein ida ne’e iha bazé.
Xefe Suku Uato-Haco, Preokupa tanba, Iha Suku Uatu-Haco urjente liu mak bee-moos, kuaze maioria husi povu Venilale ne’ebé konsentra iha area Uatu-Haco nia laran ne’e maiória sosa bee, depois aldeia ne’ebé mak do’ok husi suku ne’e mak estrada, sira atu asesu estrada ne’e susar, tan ne’e mak estabelese sentru votasaun iha sira nia aldeia.
“La asesu bee-moos durante ita ukun-an to’o agora komunidade hola bee lorloron, sira ne’ebé mak osan iha hola iha tanque 5000 Liter ne’e, husi bee matan mai iha sira nia uma, tanque ida $ 35 dollar, no povu baibain sira osan ladun iha sira hola bee iha bidon, bidon ida $ 1.50 sen, bee barak maibé iha okos, sidade iha tiha fali leten.” informa, Xefe Suku Uatu-Haco Crisóstomo Correia iha Sentru votasaun suku Uato-Haco, Postu-Administrativu Venilale, Munisipiu Baucau, 19/3.
Crisóstomo Correia, rekomenda, Autóridade lokal sempre halo proposta ba governu maibé povu hein ba hein laiha resposta. Ho nune’e ohin ita hili tan ona kandidatu Prezidente Republika na’in 16, karik ida mak eleitu ba Prezidente Republika tau atensaun ba Estrada ho bee-moos.
Entretantu, Suku Uatu-Haco hamutuk 3797 votantes, ne’ebé hafahe tiha ba sentru votasaun tolu, sentru votasaun ida iha aldeia Osogori, Lia-Bala no Uaitalibu’u ho Uatu-Hasa mak vota iha suku Uatu-Haco.
Crisóstomo Correia, akresenta, Distansia iha Suku Uatu-Haco ba Aldeia Osogori 12 kilometrus, no ba Lia-Bala por volta de 11 ital kilometrus, sentru votasaun tenki iha ne’eba tanba bazeia distansia ne’ebé mak do’ok sira labele la’o, entaun Autoridade lokál propoin situasaun ida ne’e ba membru governu sira para votantes sira la’o besik hodi nune’e ezerse sira nia direitu ho masimu.
Nia dehan, Partisipasaun votantes enjeralmente iha periodu uluk to’o agora ho masimu, iha eleisaun Prezidensial ho eleisaun parlamentar uluk ne’e sira partisipa masimu.
Nia realsa tan katak, Ema difisiensia iha Aldeia Uatuhasa na’in lima, maibé koordena tiha ona ho xefe aldeia sira hodi mobiliza kareta partikular ba tula sira hodi mai ezerse sira nia direitu, no Uaitalibu’u na’in haat.
Tuir Observasaun Neon Metin iha Terrenu, Votantes sira ho antosiazmu hakbesik-an ba sentru votasaun hodi ezerse nia direitu no hetan seguransa masimu husi Polisia Nasional Timor-Leste, Ofisial Polisia Suku (OPS), Komisaun Nasional Eleisaun (CNE), Sekretariadu Tekniku Administarsaun Eleitóral (STAE).
