Reportajen Santina Lucia da Costa
Atuál Sekretáriu Estadu ba Asuntu Kombatente no Libertasaun Nasionál (SEAKLN), Julio da Conceição “Loro Mesak” ne’ebé troka Gil da Costa Monteiro ‘”Oan Soru”, hateten, sei kontinua tau prioridade ba serbisu halo verifikasaun dadus veteranus tinan 2009, no rekolla restus mortais eroi no martires da patria sira nian.
Sekretariu Estadu ba Asuntu Kombatente no Libertasaun Nasionál (SEAKLN), Julio da Conceição “Loro Mesak” hateten asuntu ne’e ba Jornalista sira hafoin simu posse husi Prezidente Republika, Francisco Guterres Lú Olo iha Palasiu Prezidensial Nicolau Lobato, Bairu-Pite, Dili, 22/3.
Loro Mesak dehan, mandatu ne’ebé simu tempu badak tebes, maibé sei esforsu-an atu kontinua serbisu planu ne’ebé iha nanis ona, SEAKLN sesante ho Ministru Asuntu Kombatente Libertasaun Nasional (MAKLN) hala’o tiha ona, mai kontinua de’it tanba mandatu hela tinan ida ho balun de’it.
Nia hatutan, Sei kontinua de’it serbisu ne’ebé iha hanesan dadus tinan 2009 nian dadus uma lisan nian, restu mortais sira, serbisu hamutuk ho MAKLN nian, atu haree to’ok kona-ba osan ne’ebe atu investe.
Verifikasaun dadus ba veteranus sira ne’ebé regista iha tinan 2009 loloos remata ona tuir kalendariu ne’ebé SEAKL iha, maibé tan pandemia Covid-19 no kalamidade publika ne’ebé Timor-Leste infrenta, serbisu sira Ministeriu nia pendente.
“Foin lalais planu kona-ba verifikasaun dadus tinan 2009 nian, to’o oan soru la konsege halo hotu, hau sei kontinua ida ne’e prioridade primeiru, tanba agora dadauk hau iha Suai toma konta Suai nian, mais se la para karik oras ne’e hotu ona, maibe tanba para tiha entaun fulan Abril agora komesa fali.” Hateten, Loro Mesak.
Nia realsa tan katak, nu’udar veteranu knar ne’ebé simu husi Xefe Estadu no Xefe Governu Sentimentu di’ak, hanesan ema veteranu hanesan naha todan ida tenki lori, ne’e responsabilidade boot ida ne’ebé tula iha kabaas atu lori hodi serbisu nasaun no povu Timor-Leste.
