Reportajen Joselina dos Santos
Komisaun Nasionál Eleisaun (CNE) ho Sekretariu Tékniku Administrasaun Eleisaun (STAE), sei hamutuk ho parte hotu hanesan observador, fiskais no Komandu Jerál PNTL halo verifikasaun ba votus reklamadu hamutuk 3.000 ne’ebe sei iha, antes fo sai rezultadu ba públiku kona-ba mantein primeira volta ou avansa ba segunda volta.
Hafoin abertura, Prezidente CNE Jose Agostinho Belo hateten ohin ne’e tuir eleitorál katak, depois de STAE halo nia kontajen iha nivél munisípiu, sira sukat kedas mai iha sede ho urna kompletu, tanba ne’e ohin sira halo abertura, konvida parte hotu no ema interesante sira, atu nune’e asegura katak abertura ne’e transparénsia ba ema hotu.
“Ita sei halo verifikasaun ba votus reklamadu no votus nulu, tanba ita hatene katak votus nulu ne’e sei iha 3.000, ita sei verifika hotu ida ne’e, atu nune’e hasai pontu ida katak, merese duni ba kandidatu seluk ka ou kontinua nulu, ne’e depois de verifikasaun mak ita haree,” Dehan, Prezidente CNE Jose Agustinho Belo ba Jornalista sira hafoin Abertura iha Salaun CNE Kolmera, 22/03.
Nia dehan sira sei halo kontajen tanba votus reklamadu 3.000, entaun dalaruma votus sira ne’e bele aumenta, agora aumenta persentajen ne’e to’o 51%+1 liu ka ou nafatin ho menus husi 50%+1, “ita haree ba ida ne’e mais poténsia ne’e sempre iha, bele mantein ba primeira volta ou bele mos avansa ba segunda volta, ne’e depende ba rezultadu ne’ebe sei verifika”.
“Espera katak ita sei la’o tuir deit lei, no mos prosedimentu ne’ebe iha, ita hakarak dehan atu primeira volta ka segunda volta ne’e depende ba prosesu tomak, ita la’o ho transparénsia no ema hotu hatene no ema hotu bele simu,” nia dehan.
Prezidente hatutan faze verifikasaun ne’e CNE hahú ona husi munisípiu Aileu, tanba tuir Analfabetika entaun husi A to’o Z, ita hotu akompaña no espera katak sei servisu hamutuk ho rezultadu di’ak ba kandidatu sira.
Akta husi rai liur rezultadu iha ona, maibe ne’e hanesan ofisialmente atu lori mai, tanba sei haree ba aviaun ne’ebe sei to’o tanba ne’e mak Australia sei to’o dia 25 no sira husi Europa sei to’o dia 27.
Nia hatutan sentru votasaun sira ne’ebe eziste sei nafatin, karik sei avansa ba segunda volta, tanba iha fulan ida ne’e nia laran, nune’e tenke aselera lalais apresia ba tempu ne’ebe iha, no kampaña mos sei nafatin 15 dias ba kandidatu sira segunda volta.
