Reportajen Santina Lucia da Costa
Xefe Aldeia Lia-BaLa, Suku Uato-Haco, Postu-Administrativu Venilale, Munisipiu Baucau, Florindo Vicente Guterres rekomenda ba kandidatu Prezidente Republika ne’ebé maka eleitu ba Prezidente Republika periodu 2022-2027 tenki koalia ho governu atu hasa’e salariu Xefe aldeia nian, tanba durante ne’e simu de’it insentivu fulan tolu mak hetan $ 100 dollar ne’e lasufisiente ba nesesdade lor-loron.
Ba Neon Metin, Xefe Aldeia Lia-BaLa, Florindo Vicente Guterres, hatete, hanesan Xefe Aldeia simu de’it insentivu fulan tolu simu $ 100 dollar, ne’e la sufisiente ba nesesidade lor-loron, sai xefe aldeia ne’e hili husi povu, hanesan mós Prezidente Republika ne’ebé hili husi povu.
“Ami la manan salariu ami hetan maka insentivu fulan tolu mak ami hetan $ 100 dollar, tanba sá mak ami la hetan salariu, ami hetan fali insentivu, ami nia sala iha ne’ebé, ita hotu hili hanesan, hili husi povu la tuir vaga ida, tanba sa mak ami hetan insentivu sira hetan fali salariu fulan ida de’it hetan kustu boot, depois tinan lima hetan tan vitalisia.” dehan, Xefe Aldeia Lia-Bala, Florindo Vicente Guterres iha Aldeia Lia-Bala, loron sabdu, 19/3.
Xefe Aldeia Lia-Bala, akresenta katak, durante ne’e Xefe aldeia mak besik liu povu, hodi haree povu nia situasaun nune’e mós rekolla dadus iha aldeia laran bainhira Administradór sira presija, depois fasilidade hanesan, Motor ka kareta laiha atu fasilita, la’o ain de’it, distansia husi aldeia ba Postu-Venilale 12 Kilo.
“Ami mak besik liu povu, kuandu relatoriu laloos administradór labele husu ba Prezidente Republika, husu ba ami lideransa lokál iha bazé, ema hira mak mate ona, ema hira mak muda sai, ema hira mak aumenta, rekursu umanu iha aldeia ne’e ema hira, ami mak hatene, kuandu ami la halo buat ida, sira mós iha ne’eba la halo buat ida, ami iha ne’e kole, sira iha ne’eba tur enaak, tur tiha kareta laran vidru metan sae, mais ami la’o ain tanan, xefe suku hetan motor ami xefe aldeia la hetan buat ida, ami uza ami nia kosar-been rasik.” realsa, Florindo Vicente Guterres.
Florindo Vicente Guterres konsidera durante ne’e estadu hamosu diskriminasaun ba lideransa lokál iha bazé.
Nia Rekomenda, Kandidatu Prezidente Republika ne’ebé eleitu ba Prezidente Republika karik hadia autoridade lokál hotu hahi rai ida ne’e, tane aas rai ida ne’e hadi’a mós Xefe Aldeia nia insentivu, hodi nune’e sai karik pelu menus sai ho buat ruma para mate karik fó netik buat ruma hodi moris, se karik tinan lima hotu mak povu la hili tan, fila ba povu baibain mais saida mak estadu hanoin para xefe aldeia sira hodi moris. Tanba boot sira de’it kada tinan lima hotu, sira sai hetan pensaun vitalisia, agora oinsa ho Xefe aldeia sira?
