Reportajen David da Costa Gusmao
Ministériu Saúde apresia Sentru Saúde Munisípiu 3, tanba ninia atenjimentu ba vasinasaun Covid-19 iha Timor-Leste lao diak. Sentru Saude Munisipiu 3 ne’ebé hetan apresiasaun, no hetan prémiu ho sertifikadu hosi Ministériu Saude maka Sentru Saude Munisípiu Dili, Viqueque no Munisipiu Covalima.
Ministera Saúde (MS), Odete Maria Freitas Belo dehan Sentru Saude Munisipiu 3 maka sai manan nain iha vasinasaun Covid-19 nian, primeru Dili, segundu Viqueque no terseiru Covalima, ho ida ne’e MS apresia ba sira, tanba ne’e MS mos sei fó Premiu no sertifikadu ba ekipa sira ne’ebé maka servisu hamutuk durante ne’e.
“Ami mos fó premiu ba pesoal saude sira, maibe laos fó ba hotu, ami hili pessoal saude ne’ebe ho munisipiu ne’ebé maka ninia atenjimentu vasinasaun Covid-19 ne’e lao ho diak, ho ida ne’e ami sei fó deit ba iha ekipa Sentru Saude Muniisipiu Dili, Sentru Saude Munisipiu Viqueque no Sentru Saude Munisipiu Covalima,” dehan Ministra Odete Maria ba jornalista sira iha, Palacio Da Cinzas Kaikoli, Kinta 7/07.
Nune’e Ministra Saude fó parabens ba Reijasaun Administrativu Espesiál Oecusse Anbeno (RAEOA) tanba nia vasinasaun ba Covid-19 mos lao diak maske sira la hetan premiu hosi MS.
Iha fatin hanesan Diretora Sentru Saude Munisipiu Dili (DSSMD), Agostinha Segeredo kontente tanba bele hetan apresiasaun ba atinjimentu vasinasaun Covid-19 nia, ho apresiasaun ida ne’e fó servisu boot mai tan SSMD atu nune aselera lalais porsentu tu sira ne’ebé seidauk atinje.
“Apresiasaun ida ne’e fó ba hau no estrutura tomak sentru saude Munsipiu Dili (SSMD) , no mós ba apoiu parseiru sira seluk ne’ebe maka durante ne’e suporata makaas mai iha SSMD. Hosi apresiasaun ida ne’e, la to’o ohin ne’e deit maibe fó apresiasaun ida ne’e fó tan servisu boot ida ita tenke aselera nafatin hodi atinje diak liu tan prosentu hirak ne’ebé maka sai dezafiu hela ba Dili,” nia hateten.
Tuir dados husi Ministériu Saude nian, vasina iha munisipiu Dili Primeiru ne’e atinje ona iha 89,6%, no segundu iha 84,1%, Munisipiu Viqueque primeiru atinje 94,5% no Segundu iha 83,7% no Iha Covalima primeru Vasina Atinje ona 96,9% no segundu iha 78,1%.
