Reportajen Silvino Freitas
Asosiasaun Akademika Estudantil, Fakuldade Edukasaun Arte no Humanidade (FEAH) lamenta ho kualidade serbisu estrutura Universidade Nasional Timor Lorosae (UNTL), la iha manejamentu diak ba osan estudante foun sira, ne’ebé halo rejistrasaun liu-liu ba manual-orientasaun no ezije atu devolve osan.
Tuir Portavoz Estudante, Zesinho da Silva Barreto hateten nu’udar organizasaun estudante sira nian, hakarak hato’o estudante sira nia aspirasaun no direitu balun ne’ebe estudante sira la hetan agora iha orientasaun akadémika, hanesan matadalan ka manual ba orientasaun akadémika nian.
“Ami la ezije manual ne’e tenke imprime ba estudante sira, maibe resposta ba osan ne’e, studante hirak ne’e tama mai kompleta ona osan rejistrasaun hamutuk $87.00, osan sira ne’e inskreve tuir kedas item ida-idak no osan ba manual orientasaun ho montante osan $4.00 kada estudante” dehan Portavoz Zesinho liu hosi konferénsia imprensa kampus FEAH Liceu UNTL,(07/04).
Nia hatutan tuir loloos matadalan ka manual ba orientasaun akadémika ne’e distribui ba estudante sira iha momentu orientasaun akadémika realiza, la los aula normal maka distribui, maibe iha situasaun ida ne’e estudante sira lahetan matadalan ka manual ba orientasaun akadémika atu sira kaer rasik, matadalan ka manual orientasaun akadémika ba estudante foun la fahe desde 2021 to’o agora no tuir dadus estudante foun FEAH husi tinan 2021 to’o 2022 hamutuk 2089 ho montante osan $8356.00 ba manual orientasaun.
“Assosiasaun Akadémika Estudantil FEAH lamenta tebes ho kualidade servisu estrutura UNTL nian ne’ebé laiha seriedade ba atendimentu estudante sira nian, liu-liu estudante sira nia direitu, ami husu ba Reitor UNTL atu labele sai subordinadu ba estrutura sira iha ita boot nia okos, atu nune’e labele prejudika servisu administrasaun UNTL nian” dehan Zesinho.
Nia sujere ba Vise-Reitor, Pro-Reitor no Diretor Jeral sira atu labele foti-an hanesan matenek liu, no labele fo sala beibeik ba lei aprovizionamentu ninia implementasaun, no nu’udar orgaun masimu estudante sira nian iha nivel Fakuldade, husu ba Reitor UNTL atu hatun despaxu ida hodi devolve fila fali estudante sira nia osan ne’ebe entrega ona.
Fatin hanesan Senadu FEAH, Lazaro Boavida mos haforsa antes nee sira hato’o ona petisaun ba UNTL iha fulan Marsu, maibe vise-Retor sira hateten manual-orientasaun la iha nafatin, nunee nuudar responsabilidade masimu estudante nian iha fakuldade sei la nonook, maibe ezije nafatin ba erru sira ne’ebé UNTL komete.
“Sira dehan estudante sira la hetan manual, tanba lei aprivizionamentu mak todan liu, maibe iha estrutura sesante uza lei refere laiha problema dadaun ne’e akontese, maibe iha estrutura foun ne’e durante tinan 2 tutuir malu estudante sira la hetan manual ida hanesan ne’e, maske simples maibe tinan rua ne’e estudante sira lahetan” dehan Lazaro.
Nia hatutan maske problema ne’e akontese iha fakuldade hotu iha UNTL, maibe foin FEAH de’it hatoo ezijénsia ne’e, no fakuldade sira seluk seidauk hatoo, no osan ne’ebé hatama ba manual refere kuaze $40.000, maske problema ne’e seriu maibe estrutura sira la tau atensaun.
“Ohin iha media UNTL fo sai katak estudante sira hotu atu asesu ba manual elektroniku maibe ami FEAH la autoriza estudante sira atu asesu, karik asesu ida ne’e entaun osan $4.00 mak ba ona ida ne’e tanba ne’e file eletroniku ami sei la fo ba estudante sira atu asesu” nia konklui.
