Reportazen Francisco JDA
Centru Integradu Jestaun Krize (CIJK ) insera nia servisu ba prevensaun no mitigasaun pandemia Covid-19, hafoin simu responsavel hosi Ministeriu Saúde no entrega fila fali ba Ministeriu Saude.
Liu hosi konferensia imprensa, Primeiru Ministru, Taur Matan Ruak hatoo sauda ba front line sira, ne’ebe hamrik iha linhaoin hanesan cleaner, motorista, jornalista no sira ne’ebe tau matan ba logistika, professional saude sira, tanba fo rezultadu serbisu ho diak.
“Ha’u orgulho ba sira nia servisu, rezultadu servisu di’ak los, ita halakon ema hotu ne’ebé hetan moras iha ita nia rain hamutuk 25 no evita moras ne’e daet ba inan aman sira, liu liu ita la hetan ema mate”, hateten Primeiru Ministru Taur Matan Ruak iha Salaun CCD,30/06
Primeiru Ministru reforsa tan, situasaun pandemia ida ne’e afeta ba mundu tomak, too ohin dader númeru infetadu ultrapasa Miliaun 2 no númeru ne’ebé mak mate iha miliaun 500 maibe felismente Timor-Leste la iha.
“Konkista ida ne’e la’ós sala situasaun nian mesak, maibé konkista ida ne’e ita nian tomak, estadu no Povu Timor, parseiro internasionál sira, embaixada hotu, Nasoens Unidas hamutuk mak hetan konkista ida ne’e, maibé seidauk hotu no to’o rohan, ema moras iha ita nia rain la iha, mais moras ne’e sei iha no sirkular mundu tomak aumenta makaas los, tanba ne’e luta no naha seidauk too rohan”, tenik Primeiru Ministru Taur Matan Ruak.
Maske nune’e Primeiru Ministru akresenta katak kontinua prepara an di’ak liu, para evita no halo prevensaun, kumpri regras sira hosi Ministeriu Saúde no Organizasaun Mundiál, labele haluha uja maskara, distansiamentu sosial no fase liman, ijiene pesoal importante tebes.
