Reportazen Francisco JDA
Relasiona ho Polítika Partidu Kmanek Unidade Haburas Timor Oan (KHUNTO) ne’ebé iha komprimisiu polítika deklara katak sei hala’o juramentu ba membru Partidu KHUNTO, ne’ebé involve an iha governu no parlamentu hotu, inklui Prezidente Partidu KHUNTO katak kompremitidu, sei hala’o juramentu iha Ramelau tinan ida ne’e nia laran, nune’e fila fali karik halo servisu ho didiak no Justu.
Segundu Vise Presidente Parlamentu Nasional (Vice-PPN) Luis Rigobertu ba jornalista sira hateten, juramentu ba membru partidu KHUNTO, nudar kriteria ida ba partidu KHUNTO nian, atu kria unidade nasionál ida, konsidera malu nudar inan ida no aman ida, maun alin to’o mate, nune’e hametin Unidade Nasionál iha Timor-Leste.
“Husu ba iha maluk Partidu polítika sira seluk, atu labele interpreta sala kona ba juramentu partidu KHUNTO nian, tanba komesa hosi loron 4 Julho 2011 Partidu KHUNTO Eziste iha Timor-Leste, komesa ona akumula juventude Timor Laran Tomak, la hare ba Ras no sese de’it ami halibur hamutuk, hodi hamoris partidu KHUNTO ida ne’e, la’ós hamosu dezentendimentu no problema ruma iha Timor. Ami halo juramentu ne’e di’ak liu, atu evita rasismu no hakuak Timor oan, hodi partisipa iha dezenvolvimentu nasionál”, tenik Luis Rigobertu iha Parlamentu Nasionál, 01/07
Luis Rigobertu Reforsa hatutan juramentu ne’e la prejudika ba ema ida. Nasaun Demokrátika halo juramentu la iha obrigasaun ba sidadaun. Bainhira hakarak tama Partidu KHUNTO nia kriteria mak juramentu maske hemu ran.
“Juramentu ho liafuan Hemu ran ne’e la’ós foin akontese iha KHUNTO nia laran, akontese iha 1975 liu ba ita nia aman veteranu sira hemu, tanba mate ka moris ukun rasik an, lalaok ne’e mós partidu KHUNTO hala’o nafatin, atu hametin unidade nasionál iha Timor Leste no halakon violensia presiza halo Juramentu, para respeita malu no tane malu, hodi serbí ba ita nia nasaun”, hateten Segundu Luis Rigobertu
