Reportajen Zevonia Vieira
Espoza Prezidente Repúblika Cidália Lopes Nobre Mouzinho Guterres, ohin sai husi Timor-Leste ba tuir The 9th South America-Africa-Middle-Asia Women Summit (SAMEAWS) no selesionadu entre kandidatu sira seluk, atu manán Amazon Watch Magazine’s Blue Ribbon Award.
SAMEAWS halibur hamutuk feto eminente no iha influénsia ho parseiru sira husi rejiaun Amérika Sul, Afrika, Mediu Oriente no Asia ho enfaze ba sira-nia papel krítiku iha futuru ba dezenvolvimentu ekonomia, modelu papel feto eminente ne’ebé diretamente kontribui ba dezenvolvimentu hodi luta hasoru desigualdade ne’ebé feto hasoru atu hetan mudansa tuir sira-nia hakarak.
The 9th South America-Africa-Middle-Asia Women Summit sei hala’o iha Dubai, Uni Emirat Arab, iha 25 Marsu 2022.
Partisipante ba SAMEAWS mak lider feto husi nasaun oinoin, iha governu, akademista, investigadoras, emprezaria, ativista no lider feto senior sira seluk iha mundu.
Nu’udar Espoza Prezidente Repúblika, Cidália komprometidu atu hasa’e oportunidade ba asesu servisu sosial iha área edukasaun, saúde reprodutiva, protesaun labarik , eradikasaun moras hadaet no haforsa ekonomia feto.
Cidália partisipa ativa iha Organização Popular da Mulher Timor (OPMT) hodi promove emansipasaun feto. Iha 2011, eleitu nu’udar Sekretária ba Komisaun Nasionál Juridisaun no releitu filafali iha 2016-2021 nu’udar Sekretária ba Komisaun Nasionál Fiskais.
Cidália hetan konvite husi Amazon Watch Magazine no aprezenta nia kandidatura iha novembru 2021 no tuir entrevista online hodi kompete ba prémiu. Hafoin liu prosesu entrevista, Cidália sai kandidatu selesionadu númeru 9 husi país 50 ne’ebé partisipa no sei sai aprezentadora iha eventu ida ne’e.
Espoza Prezidente Repúblika sei to’o filafali mai Díli, iha 27 Marsu 2022.
