Reportajen Silvino Freitas
Planu VIII Governo indika ona Munisípiu Manatuto no Atauro sai sentru produsaun enerjia-renovavel liu hosi solar-panel, hodi halo redusaun ba gastu enerjia nao-renovavel.
Tuir Ministru Obras Publika(MOP), Abel Pires hateten estudu viabilidade ba solar-panel nudar produsaun eletrisidade ne’ebé sustentavel iha Atauro no Manatutu.
“Tamba saida mak hili Atauro tanba atu dezenvolve setór turizmu, daudaun ne’e mundu deklara ona katak Atauro nivel turístiku ne’ebé boot tebes, tanba ne’e ita kompleta tan ho enerjia renovavel” dehan Abel Pires iha ambitu Diálogu Nasionál iha Salaun Auditorium Ministeriu Finansas Ai-tarak laran,(12/04).
Tuir nia atu minimiza dependénsia ba enerjia nao-renovavel maka governu iha planu hodi hili tan munisipiu Manatuto, sai mos hanesan produsaun enerjia-renovavel tanba kada tinan governo Timor-Leste hasai osan liu $100.000 miliaun nune labele kontinua no presiza redusaun.
“Ita tenke avansa ona planu ba Manatuto nian ne’e nunee bele produs 30 too 40 Mega Wat, ita bele reduz no salva osan purvolta 40% ne’e sei diak ba ita nia nasaun, ambiente no orsamentu jeral estadu” nia konklui.
