Reportajen Santina Lucia da Costa, Zevonia Vieira
Kandidatu Prezidente Republika ho númeru sorteiu 2, Dr. Francisco Guterres Lú Olo, deklara katak bainhira mandatu hotu, sei fila fali ba Partidu FRETILIN hodi kontinua prepara ba eleisaun Parlamentar ne’ebé sei akontese iha tinan 2023, tanba Lú Olo nia vida politika seidauk hotu no nia sei hateké ba dook ona.
Hatán ba Neon Metin konaba orgullu tanba lori kargu nu’udar Prezidente Republika, iha tinan 5 nia laran? ba Neon Metin Lu Olo hatán, “hau orgullu no hanesan Prezidente Repúblika nia kumpre nia mandatu tinan lima ho dignidade, maski situasaun difisil ba nia, maibé nia konsege ultrapasa situasaun sira ne’e, halo povu hakmatek”.
“Hau sente orgullu ba hau nia-an rasik hanesan Prezidente Republika, ne’ebé hau kumpri hau nia mandatu tinan lima ho dignidade, situasaun difisil teb-tebes mai hau lori hau konsege ultrapasa situasaun sira ne’e hotu hodi halo ita nia povu ida ne’e hakmatek.” dehan, Kandidatu PR, Francisco Guterres Lú Olo, iha sede kampaña Luz Clarita, Sesta-Feira, 22/4.
Ba Neon Metin Lu Olo mos dehan sei fila fali ba partidu FRETILIN, “nu’udar sidadaun hau nia vida politika seidauk hotu. Kuandu hau dehan, hau nia vida politika seidauk hotu, signifika katak hau hateké ba dook ona.”
Kona-ba hasoru Prezidente Republika eleitu, Dr. José Ramos Horta, antes nia hetan tomada posse, karik atu fó relatóriu ba Prezidente Foun, Lú Olo dehan, “Iha hau nia serbisu fatin, ami prepara dadauk ona relatóriu atu entrega, bainhira nia hato’o karta ba, naturalmente ké Prezidensia Republika sei hasoru malu ho nia ekipa para depois bele koalia.”
