Reportajen David da Costa Gusmao
VIII Governu Konstitusionál iha Kuarta loron 1 Juñu, aprova projetu dekretu lei tolu kona ba kooperativa nian, ne’ebé aprezenta husi Ministru Koordenadór Asuntus Ekonómikus (MKAE), Joaquim Amaral.
Porta voz Governu no Ministru Prezidénsia Konsellu Ministru, Fidelis Manuel Leite Magalhães, dehan, Konsellu Ministru aprova projetu dekretu-Lei kona-ba alterasaun dahuluk ba Dekretu-Lei nu. 16/2004, loron 1 Outubru, ne’ebé aprova ona Lei Kooperativa nian sira.
“Ho alterasaun dahuluk ba Dekretu-Lei ne’e, introdús ona alterasaun balu ne’ebé bele sai nu’udar insentivu ida ba setór ne’e, tanba kooperativa sira importante tebes ba dezenvolvimentu ekonómiku Nasaun nian,” Dehan porta voz governu Fidelis, iha auditoriu Ministeiru Finasa Aitarak Laran, Kuarta 1/06.
Iha sekuénsia husi alterasaun ida-ne’e, Konsellu Minitrus aprova projetu Dekretu-Lei tolu mak hanesan, Kooperativa Komersializasaun nia, Kooperativa Agríkola, no kooperativa peska.
“Dahuluk maka projetu dekretu-Lei kona-ba Kooperativa komersializasaun nian, Diploma ne’e atu estabelese rejime jurídiku espesífiku ba kooperativa komersializasaun nian,” nia hatete.
Nia haktuir iha projetu dekretu daruak maka projetu Dekretu-Lei kona-ba Kooperativa agríkola sira. Diploma ne’e atu fó espresaun legál ba tendénsia atuál no futura sira kona-ba alargamentu husi área tradisionál intervensaun nian kooperativa agríkola sira.
Nune’e mós iha projeitu dekreitu datoluk maka projetu Dekretu-Lei kona-ba Kooperativa peska sira. Diploma ne’e atu fó kuadru legál ida ne’ebé kompletu liu ba kooperativa peska nian sira, ne’ebé bele permite dezenvolvimentu peska sira iha Timor-Leste.
