Reportajen Santina Lucia da Costa
Ministru Finansas (MF), Vise-Ministru Finansas (VMF) ho Xefe Gabinete Primeiru Ministru (Xefe-GPM) hasoru malu ho Prezidente Repúblika, Dr. José Manuel Ramos Horta hodi relata kona-ba reuniaun parseiru Dezenvolvimentu ne’ebé hala’o iha Ministériu Negósiu Estranjeiru no Kooperasaun (MNEK).
Hafoin enkontru Ministru Finansas (MF), Rui Gomes informa reuniaun parseiru Dezenvolvimentu ne’ebé hala’o hahú loron ohin iha MNEK no enkontru bilaterál sei kontinua aban depois sei taka to’o loron Sesta-Feira iha Ministériu Finansas.
“Hau ho Vise-Ministru Finansas no Xefe Gabinete Primeiru Ministru, mai informa ba Prezidente Repúblika kona-ba ita nia reuniaun parseiru dezenvolvimentu ne’ebe hala’o hahu daudaun agora iha MNEK, enkontru bilateral sei kontinua aban depois sei taka to’o Sesta dadersan tuku 9:00, sei loke iha Ministériu Finansas sei taka iha tuku 5 lokraik.” Hateten, Ministru Finansas, Rui Gomes ba jornalista sira iha Palásiu Prezidensiál Nicolau Lobato, Bairu-Pite, Dili, 7/6.
Ministru Finansas dehan tema ba reuniaun tinan ida ne’e nian maka koalia kona-ba oinsa rekupera ita nia ekonomia hamutuk, no mós oinsa maka iha sosiedade ida ne’ebé reziliente liu.
Rui Gomes esplika reziliente tanba ita hatene katak, ita nia illa ida ne’e, ita hetan impaktu maka’as husi mudansa klimatika, portantu ida ne’e ita presiza buka meius hamutuk ho ita nia parseriu dezenvolvimentu bele aliña programa sira ne’e para halo ita nia sosiedade reziliente forte liu tan, bainhira hetan soke mudansa klimátika no seluk tan.
Nia akresenta, Iha loron Sesta-feira sei aprezenta lubuk ida, sei lansa roteiru kona-ba politika finansas publika, kadeia valór no mós produtu ne’ebe halo iha Timor to’o iha konsumidor sira, ne’e sei aprezenta husi Xefe-GPM, no kona-ba adaptasaun klimatika sei aprezenta husi Sekretáriu Estadu Meiu Ambiente (SEA) no ikus liu kona-ba aspetu nutrisaun, des-nutrisaun liuliu ba labarik no inan sira, ida ne’e afeita tebes Timor-Leste nia sosiedade, Aprezenta husi husi Dra. Odete Viegas.
Nia realsa tan katak parseiru sira ne’e balun iha rai laran, balun iha Singapura, Jakarta, balun liu husi video konferénsia, no balun sei mai, parseiru sira mak ita nia Embaixadór sira ih rai laran no mós ita nia multilateral sira hanesan Banku Mundial, Banku Dezenvolvimentu Ázia (ADB), JICA, no sira ne’ebe tulun Timor-Leste.
Nia haktuir Prezidente Republika mós aseita, atu ba fó mensajen iha ne’eba, koalia kona-ba perspetiva Prezidensia Repúblika nian ba dezenvolvimentu Timor-Leste ba aban bainrua. Prezidente nia mensajen mós sei foka liu ba nutrisaun ba labarik no inan sira nian ba tinan ida ne’e.
