Home Saude Sentru Saúde Quelicai Laiha Bee, Família Pasiente Tenke Kuru Bee iha Komunidade...

Sentru Saúde Quelicai Laiha Bee, Família Pasiente Tenke Kuru Bee iha Komunidade Sira

5921
0
Xefe Sentru saúde Postu Quelica, Munisípiu Baucau, Salomão Gama, (Foto-Mena | 24.11.2023]

Reportajem Filomena da Conceição

Sentru Saúde iha Quelicai, Postu Administrativu Quelicai, Munisípiu Baucau, laiha Bee, tanba ne’e Família Pasiente sira tenke ba kuru bee iha komunidade sira ne’ebé maka besik iha Sentru saúde  ne’e, no sentru saúde ne’e kleur ona laiha bee maibé governu seidauk rezolve ida.

Xefe Sentru saúde Quelicai, Salomão Gama  hateten, sentru Saúde Quelicai enfrenta problema bee desde tinan barak ona to’o ohin loron, maibé  laiha governu ida mak bele rezolve refere, tanba ne’e,  pasiente sira ne’ebé halo tratamentu iha centru saúde Quelicai obrigadu tenke kuru bee husi komunidade sira ne’ebé  hela besik iha centru saúde.

“Centru saúde Quelicai Laiha bee ka menus tebes iha tempu bairoloron, no iha tempu udan ita bele dada komunidade nia bee ne’ebé besik, maibé tempu bailoron bee laiha, maske iha intalasaun iha torneira sira ne’e iha maibé,  laiha bee”, dehan Salomão ba Neometin iha Sentru saúde Quelicai, Kinta 23/11.

Nia haktuir, pasiente hirak ne’ebé baixa iha sentru Saúde Quelicai obriga tenke família ba kuru bee iha komunidade sira nia uma ne’ebé besik, no familia pasiente balun lori bee husi uma hafoin bele uza.  Problema bee ne’ebé sentru Saúde Quelicai enfrenta difikulta tebes ba inan isin rua sira ne’ebé hala’o partus iha sentru Saúde Quelicai, tanba ne’e, nia  husu ba parte relevante sira, liuliu ba Ministériu Saúde hodi bele konsidera sira nia preokupasaun.

“Espera guvernu foun bele tau matan ba centru saúde Quelicai, liuliu ba problema bee, tanba centru saúde Quelicai iha suku 15 no susar atu hala’o atendeimentu ho di’ak ba komunidade sira bainhira laiha bee”, Nia espera

Iha fatin hanesan, Xefe Suku Bualale Gabriela Belo, salienta nu’udar Xefe Suku ne’ebé pertense ba Postu Administrativu Quelicai nia rekoñese katak problema bee sai sai preokupasaun bo’ot ba komunidade sira ne’ebé mak halo tratamentu iha centru saúde Quelicai.

“Hanesan Xefe suku ida ne’ebé pertense ba Postu Administrativu Quelicai nian, durante ne’e ha’u hare’e problema bee sai preokupasaun boot ba komunidade sira ne’ebé hala’o tratamentu iha centru saúde Quelica, tanba dalaruma komunidade sira ne’ebé hala’o tramentu balun lori bee husi uma”, dehan Gabriela.

Nia akresenta, bee sai fator importante ba  ema nia moris tanba ne’e governu presiza  foti desizaun ne’ebé seriu hodi responde ba  preokupasaun povu nian, tanba sentru Saúde mak fatin ne’ebé sagrada hodi salva komunidade no inan isin rua sira nia vida.

Aliende ne’e, centru saúde Quelicai iha postu saude (6),  funsionariu permanente hamutuk (20) pessoas no moras ne’ebé ho númeru a’as iha sentru Saúde Quelicai mak moras ispa.

Print Friendly, PDF & Email

LEAVE A REPLY

Please enter your comment!
Please enter your name here