Reportajen David da Costa Gusmao
Ministru Defeza, Filomeno da Paixão de Jesus informa konaba planu rekrutamentu ba membru Falintil-Forsa Defeza Timor-Leste (F-FDTL), hamutuk nain 600 sei hahú iha fulan Agostu tinan ida ne’e.
“Tinan ida ne’e ita planu sei hahú halo rekrutamentu ba membru F-FDTL foun iha fulan Agostu hamutuk ema 600 kadetes,” Dehan Filomeno hafoin remata reuniaun ho Primeiru Ministru Taur Matan Ruak Iha Palasiu Governu,Tersa 5/07.
Iha prosesu rekrutamentu ba membru F-FDTL iha tinan 2021, hahú implementa tau prioridade ba veteranu nia oan, ida ne’e politikamente konaba veteranu nian. Iha tinan ida ne’e mós kontinua rekruta veteranu nian oan, atu nune’e seguransa iha Timor ne’e metin no diak liu.
“Politikamente ita koalia buat veteranu nian oan, kestaun diak ita bele koalia. Hau pesoal sei la koalia ema ida nia opiniaun, kuandu hau koalia hau nia uma laran, hau hakarak hau nian rain ne’e, hau nian oan rasik maka hein para metin no seguru, sei ita polítika laiha ne’e hau bolu imi hotu, ita hanoin hotu konaba ida ne’e. Tau veteranu nia oan iha forsa mak diak liu ka, naran tau ema arbiru mak diak liu,” nia hatete.
Tanba ne’e iha fulan Agostu planu halo rekrutamentu foun ba membru F-FDTL nain 600 ne’e, sei rekruta foun hotu kedas, sei la foti fali sira ne’ebé teste iha tinan 2021, tanba sira iha liur hemu tua no halo problema sei la hatene ida ne’e.
