Reportajen Umbelina dos Reis
Institutu Para a Defesa dos Direitos das Crianças (IPDDC), halo esforsu hodi kombate traballu infantil iha Timor-Leste, ne’ebé oras ne’e da-dauk iha ona diskusaun iha Komisaun Kombate Traballu Infantil, Ministériu Kordenador Asuntu Ekonomia (MKAE).
Prezidente IPDDC, Dinorah Granadeiro hateten liga ho situasaun labarik sira ne’ebé fa’an sasan iha estrada ninin, sira hahú servisu hamutuk ona ho komisaun kombate traballu infantil, atu haree ba problema ida ne’e.
“Agora da-dauk ami servisu hamutuk ho Komisaun kombate traballu infantil ne’e iha ona MKAE, iha mesa to’o ohin loron ita seidauk rona rezultadu ida. Liga ho situasaun ba labarik sira kontinua fa’an sasan iha estrada, hakarak dala ida tan hateten esforsu ne’ebé ami halo maka liga ho traballu infantil, ita espera katak iha tempu badak iha lei protesaun labarik iha vigor, ho lei rua ne’e fo espasu mai ami hanesan institutu públiku bele halo servisu di’ak,” hatete Prezidente Dinorah.
Nia hatete, tanba la iha lei governu bele kria institutu bar-barak maibé institutu públiku la halo buat ida, tanba baze legal lala’o, oinsá redus labarik sira fa’an sasan iha estrada no atu lori labarik sira ba moris di’ak liu tan. Nia dehan la iha baze ida forte atu fo espasu ba sira halo servisu ida di’ak konabá asuntu labarik nian.
“Ami Komisaun dala ruma hakarak foti labarik sira ne’e atu lori fila ba família maibé iha difikuldade tanba la iha lei ida ko’alia espesífiku ba asuntu ida ne’e, entaun bele kria mos polémika iha sosiedade nia leet, lakohi katak atu kombate labarik sira nia envolvimentu fa’an sasan iha estrada ninin ba infantil sira, hakarak oinsá atu rezolve situasaun ida ne’e, maibé la fo situasaun ida ne’ebé la di’ak ba família, oinsá ida ne’e bele realiza, ita tenki mai ho baze legal,” tenik Donorah.
Nia informa konabá sira nia asesmentu, iha kazu barak liu mak ekonomia husi família ne’ebé ladun iha rendementu di’ak hodi sustenta sira nia família. Dala barak sira mos ko’alia ho labarik sira, inan-aman konabá labarik sira nia servisu iha dalan ninin, no inan-aman sira iha resposta mak rendimentu, iha kazu ne’e inan-aman sira envolve mos fa’an sasan ki’ik sira iha dalan ninin.
Nia hatete labarik barak uza sira nia tempu estuda ka halimar nian hodi fa’an sasan, ajuda sira nia família barak liu iha dalan ninin. Hafoin oras eskola nian, sira direita hala’o sira nia aktividade fa’an ida dalan ninin hanesan manu tolun, fore-rai no seluk tan.
