Reportajen Adroaldo ‘Saretukau’
Embaixada Estadus Unidus Amérika (EUA) iha Timor-Leste organiza forum KLABIS hamutuk ho jornalista timoroan sira hodi ko’alia konaba kooperasaun EUA ho Timor-Leste ho enkarregadu Negósiu EUA konaba apoiu no programa sira mak halo ona iha Timor-Leste.
Durante diskusaun enkarregadu Negósiu EUA, Tom Daley hateten aliansa no parseria sai hanesan elementu ida importante iha kooperasaun li-liu hanesan Estadu Unidus ho Timor-Leste. Kooperasaun seguransa hanesan elementu xave ida ba relasaun a nível rejiaun. Nia hato’o tipu atividade sira mak hala’o ona no atividade sira mak sei hala’o iha tinan hirak tuir mai. Iha forum ne’e enkarregadu negósiu EUA mos ko’alia konabá reabilitasaun aeroportu Baucau.
Tom Daley hatete iha Juñu 2021, Estadus Unidus konkorda ho governu Timor-Leste hodi lansa reabilitasaun konjunta aeroportu Baucau. Projetu ho orsamentu millaun $10.6 ne’e sei ajuda governu Timor-Leste superviziona di’ak liu tan ni-nia teritóriu, responde ba dezastre natural no promove dezenvolvimentu ekonómiku.
“Aeroportu Baucau sei iha benfísiu ba Timor-Leste, atu bele mellhora nia kapasidade hodi halo monitorizasaun ba teritóriu marítima. Ajuda Timor-Leste ni-nia dezenvolvimentu ekonómiku nomos bele uza ba auxíliu umanitáriu no mos responde ba dezastre naturais,” hatete enkaregadu Tom Daley iha Forum Klabis, 26/01.
Nia hatete, hosi $10.6 millaun ne’e sei uza ba reabilita lutu perímetru iha aeroportu Baucau no halo armazen ida, projetu ida ne’e mak konstroi hosi ekipa enjeñaria forsa aero EUA parseria ho F-FDTL hodi halo reabilitasaun aeroportu Baucau refere.
“Ami nia apoiu ba Timor-Leste ne’e halai liu ba parte seguransa nian nomos iha parte dezenvolvimentu ekonómiku Timor-Leste nian, atu Timor-Leste bele hetan susesu iha nia jornada, atu sai nasaun ida ne’ebé ke ho ni-nia sobernia metin liu tan,” Tom Daley hatete.
