Reportajen David da Costa Gusmao
Institutu para Defeza dos Direitus da Crianças (INDICA), realiza diálogu Nasionál Labarik ho Lider Nasionál, Parlamentu Nasionál, governu no parseiru dezenvolvimentu sira atu rona preokupasaun labarik sira nian, durante ne’e sira hasoru. Ho tema “Rona ami labarik nia lian hodi asegura no realiza ami nia direitu”.
“Ohin loron eventu ida ne’ebé importante tebes ba ita hotu iha ne’e, liuliu ba iha kik-oan sira. Eventu ne’e nia objetivu principal atu ita hotu ne’ebé maka agora dadauk kaer hela governu, kaer hela ukun, kaer hela pozisaun iha estadu ida ne’e, atu rona direita kik-oan sira nia halerik, kik-oan sira nia preokupasaun ne’ebé durante ne’e sira hasoru,” dehan Prezidente Institutu para Defesa dos Direitus da Crianças (INDICA), Dinorah Granadeiro, iha CCD merkadu lama, Kinta 16/02.
Maski esforsu lubuk ida Governu halo ona, maibe labarik kontinua sei hetan situasaun difisil iha sira nia moris loron-loron nian, atu goja sira nia direitu fundamentu knaar ne’ebé hakerek ona iha konvensaun direitu labarik ne’ebé maka estadu ratifika iha tinan 2003. Esforsu lubuk ida governu halo ona, hahu husi governu primeiru to’o mai iha governu atual, maibé kontinua hasoru situasaun sira hanesan mal nutrisaun aas tebes iha Timor, ida ne’e hatudu katak esforsu hotu ne’ebe maka governu halo no apoiu husi parseiru sira seidauk bele responde ka seidauk bele resolve problema ne’e.
“Tanba ne’e maka ami hakarak bolu ita hotu, nain ulun sira hotu, parseriu dezenvolvimentu sira hotu, no entidade sira hotu atu bele tau prioridade, hahu husi agora ba futuru, sei ita ko’alia katak labarik maka futuru nasaun nian, investimentu hahú kedas husi sira wainhira idade zero,” nia hateten.
Bainhira inan ida kous labarik ne’e investimentu tenke hahu kedas, tanba tempu ida ne’e maka dezenvolvimentu ba labarik sira hahu to’o iha tina sanulu. Ne’e investimentu governu tenke tau atensaun atu nune’e bele hamoris jerasaun ne’ebé maka bele kontribui ba dezenvolvimentu nasaun ida ne’e.
Reprezentante UNICEF iha Timor-Leste, Billal Durrani sente kontente tebes iha ohin loron tanba labarik sira maka sai sentru atensaun no dirije diskusaun sira kona-ba asuntu labarik sira hasoru no propoin solusaun sira.
“Loron ohin imi nian tanba ne’e hau sei la demora no ami rona tenke rona imi, kuaze metade husi imi, tanba labarik sira iha Timor-Leste moris iha iha liña pobreza. Kuaze metade husi imi maka raes badak,” dehan Billal
Entretantu iha diálogu nasionál labarik entre Lider Nasionál, Membru Governu, Parlamentu Nasionál no parseiru dezenvolvimentu ne’e, partisipa husi estudante sira ne’ebé eskola iha Dili laran, labarik sira husi Tibar ne’ebé hili foer, labarik ho defisiénsia no labarik sira faan sasan iha merkadu no dalan ninin sira.
