Reportajen Adroaldo “Saretukau”
Strategy and Engagement Lead Oxfam Timor-Leste, Adilson da Costa Junior hodi membru Rede Koligasaun Agrikultura, hato’o ba governu liu hosi Ministériu Agrikultura no parte relevante seluk atu investe ho Orsamentu Jeral Estadu (OJE) 2023 boot liutan iha setór agrikultura no setór produtivu seluk, no promove joven iha área rural sira nia kriatividade rasik ba dezenvolve setór agrikultura, tanba nu’udar setór ida sustentável no fo moris di’ak ba família no komunidade.
Iha lansamentu bulletin média tour Kinta-feira, 28 Jullu, iha edifísiu Oxfam, Hudi-Laran, Adilson hatete, orsamentu estadu 2022 ne’e nia haree katak, iha seitor agrikultura nafatin governu tau orsamentu ki’ik ne’ebé seidauk to’o 5%, maibé hosi total orsamentu ne’ebé mak governu propoin, liu-liu Ministériu Agrikultura hamutuk 2% liu hosi total orsamentu tomak, ida ne’e susar tebes dezenvolve setór produtivu sira.
“Ami hanoin katak, Rede koligasaun nafatin ezije ba governu iha orsamentu 2023 tenki investe duni, tenki aumenta duni orsamentu ba setór agrikultura no mos setór produtivu sira, inklui mos promove joven sira iha área rural ne’ebé iha ona kriatividade, iha ona poténsia, iha ona inisiativa rasik hodi dezenvolve seitor agrikultura sira ne’e. Tenki investe tanba ida ne’e hanesan investimentu ida sustentável no ita bele hatete katak diversifikadu tanba bele kria oportunidade servisu ba sira nia aan rasik, ba grupu, ba komunidade sira ne’ebé mak sira hela nomos bele ajuda família uma kain ni-nian,” dehan Adilson Kinta-feira, 28/07.
Adilson husu, atu orsamentu 2023 governu tenki investe duni iha setór agrikultura no setór produtivu seluk ho pursentu osan ne’ebé boot, atu nune’e setór refere bele fo moris di’ak ba povu. Ida ne’e mak Oxfam hamutuk ho membru Rede koligasaun agrikultura sira nia esperansa ne’ebé inklui organizasaun sosiedade sivíl, jornalista sira, grupu feto no ema ho difisiénsia ne’ebé nafatin fo hanoin ba polítiku na’in ba orsamentu 2023 nian, ne’ebé tenki tau prioridade ba seitor agrikultura.
Liu hosi lansamentu média tour ne’e, Adilson hato’o mos katak, joven agrikultor barak mak hala’o aktividade iha área rural maibé média la to’o atu hakerek hodi hato’o ba públiku konabá sira nia susesu sira, tanba ne’e mak média tour ida ajuda tebes bele lori sira nia istória susesu sira, hato’o ba makaer ukun sira hodi investe maka’as liutan iha seitor agrikultura.
“Objetivu hosi produsaun média tour ne’e, ami hanoin katak ita koko atu konfirma saída mak orsamentu ne’ebé governu aloka iha seitor produtivu sira ne’e ho realidade saída mak akontese iha baze. Interesante tebes bainhira ita haree iha deskobrimentu sira hosi relatóriu média tour ne’e ita haree katak iha joven lubuk ne’ebé halo hela aktividade produtivu iha seitor agrikultura, hakiak animal, hakiak karau, habokur karau, iha grupu joven feto ne’ebé halo servisu indústria prosesamentu iha agrikultura. Entaun oinsá atu lori sira ni-nia poténsia ka sira nia kreatividade ida ba públiku atu bele hatene inklui mos ba ukun na’in sira,” dehan Adilson.
Nia hatutan, liu hosi bolletin ida ne’e sei nafatin haruka ba ukun na’in sira ne’ebé hola desizaun iha seitor relevante ne’ebé joven sira servisu ba liu-liu iha agrikultura no seitor seluk tan. Nia dehan, informasaun ida ne’e sira hakarak duni to’o iha ikun na’in sira, atu nune’e sira dezeña sira polítika no programa tuir realidade mak iha.
