Reportajen Joselina dos Santos
Sekretaria Estadu ba Igualdade no Inkluzaun (SEII), sei realiza loron nasionál Feto Timor-Leste, ne’ebe sei monu iha loron 3 Novembru 2022. Liuhusi konferénsia imprensa, Sekretariu Estadu ba Igualdade no Inkluzaun (SEII), Maria do Rosario Fatima Correia hateten, iha loron nasionál feto objetivu atu Promove feto liuhosi dezenvolve kapasidade, akompaña no apoiu rekursus hodi halo promosaun, ho nune’e fó garantia ba feto hodi bele partisipa iha kualkér atividade liuhosi envolvimentu feto iha foti-desizaun iha instituisaun públiku, partidu polítiku, setór privadu no doméstika nian.
Nia dehan SEII hanesan instituisaun Estadu ne’ebé tuir dekretu lei 17/2019, ho nia Papél no responsabilidade atu halo advokasia, koordena, implementa, no avalia estratéjika Abordajen Integrada Jéneru (AIJ), iha polítika, lei, programa, planu, no orsamentu iha instituisaun Estadu nian hodi bele promove igualdade jéneru, halakon diskriminasaun no violénsia oioin hasoru feto, labarik-feto, no grupu risku sira, hakbiit feto iha setór ekonomia nomós hasa’e partisipasaun feto iha polítika no foti-desizaun iha nível hotu, tantu nasionál, munisipál, no lokál.
“Atu promove igualdade no inkluzaun ami hala’o ona atividade oioin inklui mós komemora loron improtante haat ne’ebé tinan-tinan SEII sempre organiza hanesan Loron Internasionál Feto, Loron Internasionál Feto Rurál, Kampaña Loron 16 Ativizmu Kontra Violénsia Hasoru Feto no Labarik-Feto no Loron Nasionál Feto ne’ebé monu iha loron 3 fulan Novembru”, Dehan, Sekretaria Estadu Maria do Rosário Fátima Correia, liu husi Konferensia Imprensa iha Salaun SEII Kaikoli, 26/10.
Tema nasionál ba tinan ne’e mak “FETO PRONTU LIDERA” ho nia signifikante katak tempu ona atu feto sira brani mosu iha palku polítiku, no konkorre-an iha eleisaun sira atu sai hili na’in no ema hili iha foti-desizaun sira tantu públiku no privadu iha nivel nasionál, munisipál, suku to’o aldeia sira.
“Objetivu husi tema ne’e atu hala’o advokasia hodi kontinua hamoris nafatin espíritu luta ba dignidade Feto Timor iha sosiedade patriarkál, ne’ebé kontinua reziste hodi fó espasu no oportunidade atu feto sira hola parte iha prosesu dezenvolvimentu iha setór oioin atu Promove feto sira-nia luta hodi hetan direitu tuir dalan justisa, igualdade ne’ebé inklusiva, liberdade no lialoos ba moris di’ak no dignu”, nia selenta.
Nia konklui atividade sira ne’ebe sei hala’o iha Selebrasaun Loron Nasionál Feto Timor-Leste Mak hanesan Misa Agradesimentu ba Eróina sira, Karii Aifunan iha Tasi Ibun Portu Dili, Karii Aifunan iha Semintériu dos Eróis da Pátria Metinaro, SERTAME ba Estudante Eskola Sekundária Haat iha Dili, Kompetisaun Korru ba Estudante husi Eskola Haat husi Postu Administrativu haat iha Munisípiu Dili: Talk show/Dada-Lia (Live), Palku Muzikál ne’ebé sei mai husi banda Feto sira, Feira Fiar ba Komunidade sira.
