Reportazen Santina Lucia da Costa
Komemorasaun trajedia Balibo Five ba dala 45, Prezidente Autoridade Munisipiu Bobonaro husu governu atu harii monumentu ba jornalista na’in lima ne’ebe oho husi military Indonesia iha loron 16 Outbro 1975 iha Balibo, hodi hatudu nia istoria ba jerasaun tuir mai.
Prezidente Autoridade Munisipiu Bobonaro, Jeferino Soares dos Santos iha nia intervensaun hateten iha tempu invazaun Indonesia ema koñese Balibo integrasaun, mais iha tempu ne’eba hamosu istoria ida ne’ebe halo povu Timor-Leste triste istoria, ikus mai ita hanaran Balibo Five. Istoria ida ne’e ita hatene no husu atu labele akontese tan iha tempu oin mai.
Prezidente Autoridade Munisipiu Bobonaro husu ba governu atu harii monumentu ida ba jornalista na’in lima, hodi bele hatudu nia istoria ba jerasaun tuir mai.
“Ita hotu hamutuk iha ne’e, fatin ne’e fatin istoriku, maun boot Ramos Horta ho membru governu sira tomak karik fatin ne’e, oinsa para tau netik sinal ruma ne’ebe bele hatudu nia istoria ba jerasaun tuir mai hodi hatene, ami hatene katak governu iha ona politika, karik atu harii monumentu ka buat ruma bele fo sinal ruma, ida ne’e Balibo nia esperansa ba povu Timor tomak, atu nune’e fatin ida ne’e sai duni fatin istoriku”, informa Jeferino Soares dos Santos.
Jornalista estranjeiru nain lima ne’ebe hetan oho ho naran Greg Shackleton, Tony Stewart, Brian Peters, Malcom Rennie no Garry Cunningham husi militar Indonesia iha Balibo.
Hatan ba kestaun ne’e Ministru Asuntu Parlamentar Komunikasaun Sosial (MAPCOMS), Francisco Martins da Costa Jeronimo hateten ida ne’e pedidu ne’ebe hato’o ba governu, hanesan reprezentante governu Central mai iha Balibo, lori fila ba iha ne’eba atu aprezenta ba Primeiru Ministru.
“Hau sei aprezenta ba Primeiru Ministru kona-ba atu harii monumentu refere ba ita nia jornalista ne’ebe mak mate iha Balibo, kauza Timor-Leste nian, ba hato’o ba iha governu, liuliu iha Ministeriu kompetente atu haree hamutuk oinsa, saida maka bele halo”, hateten MAPKOMS ba Jornalista sira iha Postu Administrativu Balibo, loron, 15/10.
