Home Notisia CNC ho KI Organiza Loron Balibo Five, Virgilio: Balibo Tenke Sai Espasu...

CNC ho KI Organiza Loron Balibo Five, Virgilio: Balibo Tenke Sai Espasu Atu Hato’o Lia Los

190
0
Prezidente KI ho Vice Ministru Estatal iha Balibo. [Foto: Francisco JDA | 16.10.2020]

Reportazen Santina Lucia da Costa

Centro Nasional Chega (CNC) ho Konsellu Imprensa (CI) organiza komemorasaun trajedia Balibo Five  ba dala 45, hodi relembra fila-fali jornalista nain lima hosi Australia no Nova Zelandia ne’ebe mak hetan tiru hosi tropas Indonesia iha loron 16 Outubro 1975.

Iha komemorasaun Balibo Five, Diretor Ezekutivu Centru Nasional Chega (CNC), Hugo Maria Fernandes iha diskuru hateten selesaun ne’ebe loke iha ne’e, nu’udar aktu komemorativu ida ba trajedia ne’ebe akontese iha tinan 45 liu ba.

“Dala ida tan atu fo hanoin ita, fo hanoin katak iha  konflitu  ne’ebe de’it sempre iha ema, sempre iha buat balun maka hetan estraga, ita nia konflitu internal hahu kedas iha Agostu 1975 to’o mai iha 1999, ema rihun ba rihun mak sakrifika sira nia-an, hodi hato’o buat simples ida, atu ezerse de’it direitu ida ba auto-determinasaun, direitu ne’ebe maka moris nanis wainhira ema ida hahu moris, povu Timor halo ida ne’e durante tinan 25 iha periodu ne’ebe mak 1975-1999”, hateten Hugo Fernandes.

Nia hatutan atividade ne’ebe sei halao atu dignifika luta naruk ne’ebe mak mai husi mundu jornalizmu nian, maibe mos partisipasaun ativu signifikante komunidade ida nian. Komunidade ida ne’e mak hanoin ida katak, ba nia bele moris di’ak, livre husi tauk, ida ne’e mak ba nia independensia no livre husi tauk mak forma ida husi nia nasionalismu.

“Tanba ne’e mak Centro Chega! hamutuk Konsellu Imprensa, liuliu komunidade iha Balibo para komemora loron ida ne’e no mos relembra vitoria povu nian, hanoin ida ne’e mak iha tinan 45 nia laran, trajedia ne’ebe mak akontese no mos atu fo hanoin katak, iha asuntu balun mak seidauk rezolve”, dehan Hugo Fernandes, iha Balibo, loron, 16/10.

Iha fatin hanesan Prezidente Konsellu Imprensa (CI), Virgilio da Silva Guterres reforsa, Komemorasaun ne’ebe mak Konsellu Imprensa ho CNC halo hamutuk laos ema Balibo de’it, maibe Timor tomak, atu husi rai ida ne’e hahu hatete lia los ba mundu tomak, Portugues dehan , “se a mintira comecou a qui ser e tempo dizer a verdade para todo o mundo” lia los husi ne’e, hateten lia los kona-ba saida, hatete lia los tinan 45 liu ba mundu tomak nonok, mezmu sidadun Reinu Unidu, Australiano no Nova Zelandia ne’ebe serbisu ba kanal meiu komunikasaun social Australia ninian mate iha ne’e.

“Konsellu Imprensa hamutuk ho CNC atu kontinua komemora, mezmu ke uluk ita deklara husi Balibo, Balibo agora ba oin tenki sai espasu atu ita hato’o lia los , lia los laos de’it kona-ba pasadu maibe ba jornalista sira, lia los mos ba ita nia ukun nain sira, katak tinan 20 liu ba, se por ezemplu hau mak hanesan Greg Shackleton iha ne’e, hau sei husu hanesan tinan 45, bainhira nia rona populasaun sira tamba sa mak Portugal la mai ajuda Timor, se mi sei Potugal, tanba sa mak Australia la mai ajuda Timor, se iha funu II Guerra Mundial povu Timor Ajuda sira”, esplika Prezidente Konsellu Imprensa.

Virgilio da Silva Guterres haktuir ita bele kontinua husu tanba sa mak ita ukun-an tinan 20, povu barak sei moris kiak, edukasaun sei falta, pergunta jornalistika ida ne’e mak sai hanesan motivasaun ba ita atu kontinua komemora loron importante ida ne’e.

Nia akresenta ambisaun ne’ebe mak Konsellu Imprensa  sei diskute ho nain ulun sira, maka atu tinan-tinan 16 Outobru ne’e sai hanesan eventu anual ida iha Balibo, tanba ne’e mak Konsellu imprensa sei buka koopera ho instituisaun estadu ninian hanesan Ministeriu Estata no seluktan.

Virgilio hatutan ambisaun seluk tan maka atu halo premiu jornalista, ne’ebe mak boot liu maka Balibo Five ne’ebe halo ona hosi Asosiasaun Jornalista Timor Lorosa’e (AJTL) halo tiha ona, atu koalia oinsa atu eleva premiu ne’e ninia grau, ne’ebe ne’e asuntu balun ne’ebe sai hanesan ida serbisu hamutuk ho Konsellu Imprensa ho nia parseiru sira hanesan, AJTL no Timor-Leste Press Union (TLPU).

LEAVE A REPLY

Please enter your comment!
Please enter your name here