Reportajen Joanina Casmiro
Semiteriu Santa Crus maka fatin ida ne’ebé tropas Indonezia sira tiru joven rihun ba rihun ne’ebé partisipa iha demostrasaun 12 Novembru 1991. Joven balun hetan tiru mate husi tropas Indonezia, balun hetan kanek no balun hetan kaptura. Maibe joven feto barani nafatin hodi hamrik iha mane nia sorin hodi luta ba Timor-Leste nian indepedensia.
Joana Gonçalves Amorin Dias, nu’udar mos sobrevivemte husi Masakre Santa Crus espresa ba Neon metin katak, Uluk iha demostrasaun 12 Novembru 1991 ne’e la hein ema ida atu haruka maka ba partisipa demostrasaun, maibé nu’udar joven ida iha fuan boot hodi ba tuir partesipasaun iha demostrasaun sira ne’e hodi hatudu ba mundu katak Timor-Leste hetan troturasaun makaas husi tropas indonesia.
“Tempu uluk joventude feto nia partisipasaun mos bo’ot ami lalikan hein ema ida atu haruka tanba situasaun ne’ebé difisil no Inan Aman barak mak lakon entaun ami nu’udar joven ami nia fuan ne’e nakloke entaun ami tama de’it ona iha grupu ne’ebe iha, joven feto mos barak tebes partisipa iha ne’ebá tanba ita nia situasaun difisil ita book a’an mos la di’ak estuda mos ladiak entaun ami tenke tama iha ne’eba hakarak ka lakoi ita tenke liberta ita nia a’an no mos ita nia oan, bei-oan sira tuir mai ne’e bele aproventa ho Independensia ne’ebe iha agora,” dehan Sobrevivente Jonan ba Neon metin banhira partesipa iha komemorasaun 12 Novembru ba dala-XXXI, iha santa krus, Sabadu 12/11.
Nia konta tuir iha momentu ne’ebá feto nia partisipasaun ne’e bo’ot tebes, feto barak, ferik sira iha rate laran, iha joventude, estudante, iha labarik nomós ema hotu-hotu ne’e fo nia a’an tomak ba mate. Tempu uituan ka barak ami iha unidade, feto mane hamrik hamutuk ida fileira deit, tanba objetivu hanesan.
Tanba ne’e nia husu ba joven sira hotu liliu ba feto maluk sira, agora oprtunidade ne’ebe diak, tanba govenu loke eskola gratuita, tanba ne’e joven sira bele aproveta diak-diak Para bele lori Timor-Leste ne’e ba di’ak liu tan.
Bainhira kompara entre joven feto sira uluk no agora, Joana haktuir katak tempu la hanesan no joven agora seidauk aproveita tempu ho diak.
“Tempu uluk ami la bele kontinua estudu tanba ami nia osan la iha. Tempu difisil, ita hakarak eskola mais osan la iha. Joven sira agora lae sira lakoi aproveita eskola gratuita no buat barak lakoi aproveita sira uza sira nia tempu barak liu ba buat seluk. Hau husu se bele joventude sira agora bele eskola halo di’ak, tanba agora eskola gratuitu barak sai ba liur mós barak atu nune’e fila mai ita bele desenvolve ita nia rain”, tenik nia.
