Home Notisia Agrikultór Sira Iha Seloi-Aileu Prodúz Modo Maibé La Asesu Merkadu, Mariana: Modo...

Agrikultór Sira Iha Seloi-Aileu Prodúz Modo Maibé La Asesu Merkadu, Mariana: Modo La Folin

682
0
Agrikultor Mariana iha Seloi Karaik-Aileu fera hela rai. [Foto: Francisco JDA | 27.10.2020]

Reportazen Francisco JDA

Agrikultura nu’udar setór importante iha Timor-Leste, tanbasá importante? Tanba maioria populasaun iha 80% mak moris depende ba agrikultura no moris nu’udar agrikultór. Setór agrikultura mós nu’udar rekursu boot ida, hodi bele dezenvolve ekonomia hahú hosi uma laran no ba estadu.

Jornalista Neon Metin halo observasaun direita ba moris agrikultór sira iha area rural ne’ebé hasoru difikuldade barak, maski rai buras hodi kuda produtu lokál sira, maibé dalan ba sira hodi asesu merkadu laiha.

Agrikultór Antonio da Conseicao, hela iha suku Seloi Karaik munisípiu Aileu, iha entrevista ho Neon Metin nia konfesa katak nu’udar agrikultór hasoru difikuldade tanba dala ruma la asesu merkadu. Nia dehan iha tinan kotuk sente di’ak liu, tanba kompañia bele sosa modo sira ne’ebé kuda, maibé iha tinan ne’e laiha.

 “Agora ne’e osan la iha no falansu barak, maski kuda modo barak maibé balun hola no balun la hola, se la hola ami lori fila mai uma, fó han fahi ka animal sira de’it no barak liu mak estraga rai de’it, estrada mós la dun di’ak atu lori modo sira ba merkadu no modo balun bele estraga de’it”, tenik agrikultór Antonio da Conseicao, iha Suku Seloi Kraik, 27/10.

Antonio sujere ba governu atu bele tau matan netik ba povu agrikultór sira, hadia estrada sira ne’ebé mak at no labele protesta malu de’it. Presiza hare ba povu nia moris, dala barak iha kampaña partidu sira mai promete buat barak, to’o agora la iha rezultadu.

Nia dehan governu presiza investe makaas iha agrikultura, tanba se modo mak la folin agrikultór mós la halo.

Iha parte sorin Neon Metin dada lia ho feto agrikultór Mariana, ba Neon Metin nia informa katak, populasaun kontinua prodúz nafatin modo, maibé lori ba merkadu mak ema la sosa estraga de’it no fó han ba animal sira.

“Konaba produsaun modo, super merkadu Kmanek mak foti, maibé agora Kmanek taka ona, entaun sira la mai ona, bainhira lori ba merkadu mak ema la hola hotu, lori fila no fo han animal sira hanesan fahi no karau”, hateten Mariana.

Iha fatin hanesan Tuir reprezentante Xefe Suku, Seloi Kraik no nu’udar agrikultór, Silvestre Pinto Monteiro informa ba jornalista sira katak, komunidade barak mak moris maioria ho modo, nune’e bainhira super merkadu Kmanek sei iha, komunidade nia rendimentu di’ak, tanba komunidade sira kuda modo oin-oin, sira kuda no kompañia Kmanek mais sosa kedas no lori ba merkadu

“Komunidade nia difikuldade ba agrikultór mak sira kuda modo, maibé asesu ba merkadu la iha tanba ema estranjeiru fila tiha ona, modo ne’ebé folin mak broccoli ho cauliflower no pipinu sira. Mezmu todan maibé folin di’ak, entaun estranjeiru sira ba tiha, modo sira ne’e la folin kedas. problema mak modo metan no mutin mak ba Taibesi de’it no vendedór sira sosa tutan fali nia folin la hanesan”, hatete Silvestre Pinto Monteiro iha nia knaar fatin Seloi Karaik, 27/10.

Nia dehan bainhira sei iha super merkadu sira hanesan Dili Mart , Kmanek no seluk tan komunidade mak ho rendimentu di’ak, no agora nia problema boot mak komunidade agrikultór barak mak nia produtu la asesu  merkadu ho di’ak.  

Hosi relatóriu ne’e Oxfam rekomenda atu governu muda nia foku investimentu husi konstrusaun estrada prinsipál sira, ba hadi’ak dalan no estrada ne’ebé liga agrikultór ba merkadu. konsidera inisiativa ne’ebé sei hasae disponibilidade transporte públiku ba agrikultór-vendedór sira, ne’ebé buka atu fa’an sira-nia produtu iha merkadu. Hasa’e fornesimentu bee ba irrigasaun nian, liuliu esplora poténsia sistema irrigasaun ne’ebé la depende ba bee iha rai leten, maibé esplora bee iha rai okos, promove operasaun no manutensaun ba sistema irrigasaun ne’ebé iha ona. 

Neon Metin halo kobertura konaba agrikultura iha area rural, ida ne’e parte hosi Media Tour ne’ebé realiza hosi Asosiasaun Jornalista Timor Lorosa’e (AJTL) serbisu hamutuk ho Oxfam, ho objetivu lori jornalista sira ba area rural, hodi buka tuir situasaun ne’ebé agrikultór sira hasoru, maske rai buras no iha produsaun barak maibé susar atu asesu merkadu tanba Estrada at no la dun iha atensaun másimu hosi governu.

Print Friendly, PDF & Email

LEAVE A REPLY

Please enter your comment!
Please enter your name here