Reportajen Umbelina dos Reis
Kongresu RENETIL da-ualu nian, kongresista Maria Irene Freitas Siqueira, hatete, RENETIL fo oportunidade ba joven Timoroan sira, hodi nafatin buka esperiénsia hamriik metin hodi luta ba dezenvolvimentu iha rai ida ne’e, maibé jerasaun agora joven barak mak lakon ona sira nia espíritu patriotizmu no nasionalizmu, tanba kestaun ekonomia, nune’e joven barak mak gradua ona maibé governu husik abandona tanba la iha kampu traballu ba sira, sira tenki buka rasik hodi ba hotu rai li’ur.
Kongresista ne’e dehan, atu halo kontribuisaun ba ita nia nasaun ka komunidade ita tenki ho konsiénsia, tuir nia presektiva katak joven barak mak agora ba buka moris rai li’ur hanesan Portugal ne’e, tanba governu la iha empregu ba joven sira, nune’e joven barak tenki trata dokumentu ba rai li’ur hodi buka moris iha ema nia rai.
“Tanba ita nia governnu mak fo oporrtunidade ba embaixada sira, entaun joven sira trata dokumentu ba hotu rai li’ur maibé joven sira ba servisu iha ne’ebá la’os ba servisu espesial ka kantor, la iha, maibé ita nia joven sira ba servisu hanesan burukasar, maibé diferente ne’e iha saláriu de’it, ida ne’e mak nu’udar ami feto nia preokupasaun ba joven Timoroan bainhira hakat sai ba rai li’ur,” dehan Maira Irene iha Kongresu RENETIL da-ualu ne’ebé hala’o iha Centro Convenção de Díli, Sábadu, 3/12.
Nia akresenta, RENETIL ida uluk no ida agora tuir nia hare iha mudansa, tanba RENETIL uluk ne’e estudante hotu, maibé RENETIL agora balu estudante no balu servisu ona. “Ha’u partisipa eventu Kongresu RENETIL nian ba da-ualu ne’e, ha’u sente kontente tanba joven máksimu mak sei tuir nafatin kongresu ne’e, ha’u fiar katak liu husi RENETIL joven barak mak sei lori dezenvolvimentu ba ita nia rai rasik,” nia hakotu.
